، الله بيدوَّر عليك

[walaa farouk]

مفيش مرة حسيت إنك مكسوف من ربنا؟

طبيعي الإنسان لما بيغلط مابيحبش حد يشوفه، عايز يتدارى في حتة لوحده وبيخاف إن غلطته تتعرف علشان شكله قدام الناس، هيقولوا عليه إيه، ولو عليه يستخبى من الدنيا كلها، نفس الإحساس ده كان عند آدم زمان لما غلط في حق ربنا وكسر الوصية، مكانش بس مكسوف دا كان هربان كمان، لكن ربنا جه بنفسه في الجنة يدوّر عليه، مش علشان يعاقبه أو يذِله زي ما كان فاكر!! لكن علشان يصلح العلاقة اللي اتكسرت بينهم، بس آدم كان كل همه يستر نفسه قدام ربنا علشان بان على حقيقته قدامه!!

كتير إحنا بنعمل كده لما نكون مكسوفين وعارفين إن ربنا شايفنا وعارف كل اللي بنعمله بنروح نتدارى في حاجات تبان إنها كويسة "صوم - صلاة - عطا" لكن في حقيقتنا خايفين ومرعوبين من عقابه، رغم اللي عمله آدم، الله ماسبهوش، عمل بنفسه أقمصة جلد لِه هو وحوا وغطاهم.. حلو إن احنا نصوم ونصلي وكل الحاجات دي بس المهم تكون دي حقيقتنا بجد مش بنداري على غلطنا بأعمال كويسة، الله بيدوَّر عليك علشان يصلح العلاقة اللي باظت بينكم لأنه بيحبك وانت غالي عليه .. هتقبل تروح له ؟!