على قد ما تقدر قل من عشمك

[walaa farouk]

من وجهة نظرى ان "العشم" اكبر جريمه ممكن الانسان يرتكبها فى حق نفسه ..

-كسرة النفس اللى بتشوفها فى عين اى واحد او واحده بعد اى خذلان بيتعرض ليه من حد حبه، عمر ما كان سببها انه متحبش، كلنا ياما حبينا و متحبناش و اشطا يعنى الدنيا موقفتش، لكن كسرة النفس و الحزن اللى بتبان فى عنيه بيكون سببها انه اتعشم "اتعشم فى حب الشخص ده و حتى لو فى مليون حد احسن منه مش عاوزهم" عشمك فى الحاجه او الشخص اللى قدامك هو اللى بيهدك مش حبك ليه..

- فرحتك بالفستان ع المانيكان و جنانك بيه هو اللي بيقتلها لما تقيسيه و تلاقيه مش ع مقاسك، قفلتك من اى لبس بعد كده بيكون سببها عشمك فى الفستان ده بالذات مش ان باقى اللبس وحش "انتى اتعشمتى فى الفستان ده و خلاص" حتى لو غيره احلى منه مش عوزاه" ..

- انتظارك بالساعات لاكلة ف الفرن و ف الاخر تلاقيها ناقصة ملح دا ممكن يخليك ماتكلش اليوم كله مع ان امبارح كلت اكل بايت و كنت مستمتع جدا "بس انتا كنت متعشم فى الاكله دى و مطلعتش زى ما تعشمت فيها فخلاص قفلت من الاكل"..

- الموقف اللى بيحصل من حد من صحابك و بيزعلك منه جدا، رغم ان حصل اكبر منه من غيره و مزعلتش ده سببه العشم "زعلك مكانش من الموقف نفسه زعلك ان الموقف حصل من الشخص ده بالذات و انتا عشمك فيه غير كده"..

العشم هو اللي بيقتل اى حاجة تانيه هتيجي حتي لو احلي، ف على قد ما تقدر قل من عشمك