|
 |
 |
 |
|
رقم المشاركة : ( 1 )
16 - 05 - 2017, 02:05 PM
|
|||||||||||
|
|||||||||||
 اللى أختشى مات نفسى افتح لك قلبى واقولك كلمات من مبدأ اللى أختشى مات بيعدى عليا وقت بخاف لا تكون قناعاتى وكل حياتى بلا أهداف ومسيرتى فى درب الدنيا خلف خلاف أوصافك مختلفة بين الكل ومحدش شاف خايف لا يكون كل كلامهم عنك حواديت صالونات علشان كده بفتح لك قلبى وأقولك كلمات من مبدأ اللى أختشى مات وأنا لسه صغير حكوا لى عن جلدك بالصوت عن قبرك وقيامتك وصعودك للملكوت سيبك من أنى مفهمتش أزاى ربى يتسلم للموت ولا عارف أرد عليهم عن شتمك ولا لطمك ولا عار الصلبوت بس سـؤال ملقتش طريق تانى غير الجرسة والأهانات أسمح لى أفتح لك قلبى وأقولك كلمات من مبدأ اللى أختشى مات واحد ربه عظيم جبار مالى الدنيا خوف وعويل والتانى شاف له إله فنان قضى حياته فى سحر الليل وأشى شكله متحنتف وجميل وأشى أطول من إيفل وأسرع م الخيل وأنت يارب نصيبى شكلك مجروح وعليل كل أصحابك شاكين ناكرين مش فاهمين وده غير الخيانات أعذرنى بقى لما أفتح لك قلبى وأقولك كلمات من مبدأ اللى أختشى مات فى الرايحة والجاية يعايرونى فى الرايحة والجاية يعايرونى بحكاية لوط وبناته واللى لفرعون أدى مراته على عينه فى حياته واللى نصب على أخوه وعملها فى أبوه ونشل بركاته واللى شهدت لقلبه بنفسك فين مزاميره وفين صلواته سيره كلها ذل وعار تيجى ايه دى جنب الفتوحات سامحنى بفتح لك قلبى وأقولك كلمات من مبدأ اللى أختشى مات طب ماتحليها ياربى بشوية بهارات حبة حركات يعنى دهب وقصور وبحور وحوريات وبدل ما نخوض فى أعراض الناس وفى خطاياهم والذلات أكتب فى كتابك بس اللى يشرفنا بالحسنات ولو ملقتش ما نشرطش من لا سلامات وتحيات معلش .. أنا بفتح لك قلبى وأقولك كلمات من مبدأ اللى أختشى مات بالنسبة لى قعدت كتير وكتير مستنى الأشارات فك الشفرات لحد ما شكيت فى الرد محدش هايعبرنى ولا بعد مئات السنوات ومانيش أجدع من توما ولا شايف نفسى داود قدام جليات أنا حتة بنى أدم عادى عايز أفهم مين هو الحق مين هو الرب اللى بيدى حياة من حقى أفتح لك قلبى وأقولك كلمات من مبدأ اللى أختشى مات أخر ما يئست لميت لخبطتى وضعف أرادتى مع لعناتى وشوية بركات حطيت العمر بكل ما فيه من قراءات وبركة وعظاته ودمع صلاته ومئات الاعترافات صريت الكل فى قلب الميت وكتبت عليه يسلم يداً بيد للساكن فى السموات ما أنت مردتش عليا قررت أبعت لك قلبى تقرا ما فيه من كلمات وكلها من مبدأ اللى أختشى مات وأستنيت .. حبه كتير مش فاكر يوم أتنين أسبوع شهرين يمكن سنتين وأخيراً " جانى الرد " شكاك خايف مش مؤمن بوسطة أيوة أمين الرب أخيراً رد عليا وجريت وفتحت وانا بذرف بدموع العين بصيت جواه لقيت (( صورتى )) إيه ده ياربى ؟؟ أنت باعت لى صورة مين ؟ هو أنا مش عارف شكلى ؟ مناخيرى .. وبقى .. ودقنى حتى سواد العين أى مراية فى بيتنا هتفكرنى بشكلى بدل المرة ألف وألفين هو ده سؤالى ؟؟ مش عايز أعرفنى .. عايز أعرفك أنت مين أنت وفين وبصيت فى ضهر الصورة لقيت شوية كلمات من مبدأ اللى أختشى مات .. سلام ونعمة ورحمة صورتك مش صورة لمخلوق عادى دى صورة لأبنى الغالى اللى لما خلقتك شكلتك على صورتى ومثالى وأديتك سلطانى على كل العالم البالى كانت خطتى ليك انك هتعيش فى السما ويايا فى العالى عهدى ووعدى أنك هتكون نجم عظيم بيضوى ويلالى لكن كدبت كلامى وكل وعودى وصدقت اللى سقط قبلك من عالى وأكلت الشر مضغته فى جوفك حتتك بتتك حلالى بلالى لوثت طبيعتى اللى رسمتها فيك ومحيت راس مالى ... حطمت لى كل أمالى أخدت حتة كبيرة من قلبى ورميتها فى مملكة الظلمات ما أنا قلبى معاك بس بموتك كان لازم تبعد عنى أصل مانيش إله أموات .. عايزك تعرف كلمة فى سرك انى " بكيت " أيوة بكيت مش مرة لكن مرات ومليت الكون بصرخ بأهات أهات من مبدأ اللى " أحتشى " فى أحشائى اللى أحتشى مات صورتك دى دليل على أنى ما فرتش فيك وأديتك تانى حياة من يوم مامشيت وأنا قلبى وحيد مستنى أجيبك تانى تعيش جواه أوعى تفكر انه مش فارق مع قلبى وجودك فيه وبقول إنشالله ما عنه اهو جاه إياك فاكر إن وظيفتى إله أتأمر وأتكبر وأتجبر وأتنطط على خلق الله أنا عايزك حتى لو عضم فى قفة هادفع فيك أرضى موطئ قدمى لااااااا أنا هادفع فيك ملكى ومجدى هادفع فيك عرشى وسماه وده مش كلام فض مجالس وخلاص أنا جيت فى خلاص بصليب لحياه عرونى .. جرونى .. أهانونى .. شتمونى .. جلدونى كل ده علشانك ياعيونى يا موالى وتسبحتى يا أحلى صلاة صورتك دى بتحكى لك عن حبى وعشقى ماهياش مجرد كلمات زى ما بتقول من مبدأ اللى أختشى مات لكن من مبدأ اللى حب .. وحب .. وحب .. وحب .. وحب 
|
| أدوات الموضوع | |
| انواع عرض الموضوع | |
|
العرض الشجري