بص ، أنا ممكن أكون ما بسألش عليك ،
ممكن اقعد فترة كبيرة ولا اعرف عنك حاجه ،
حتى احيانا ممكن تتصل بيا و اكون شايف الموبايل .. بس ما أردش عليك ،
بيبقي من جوايا بقول هكلمه انا كمان شوية علشان مش قادر ارد دلوقتى ..
و بكسل او بنسي بعد كده ، ممكن اكون مش متداخل فى تفاصيلك ولا بعرف جديدك كل شوية ،
و بالتالى ممكن و طبيعى جدا انى اكون مابشوفكش فترات كتيره ،
بس كل ده مش علشان حاجه ، مش معنى كده انى شخص ندل ،
او انت لا تعنى عندى شيء ، انت زى ما انت عندى ،
الفكرة ان ده طبعى ، يعنى انا كده مابعرفش اتغير او اهتم اهتمام مصطنع ،
ماتعرفش ده كسل ولا زهق ولا نوع من اللامبالاه او الزهد فى الكلام ،
بس اللى متأكد منه انك لما تحتاجنى هتلاقينى كأنى عايش معاك على طول ،
لما تتكلم او اتكلم مش هاتحس ان فيه حاجه غلط او العلاقة بينا اتغيرت ،
مش هحسسك انك مابتسألش او العكس ،
لو وقعت فى مشكلة ها تلاقينى جنبك للدرجة اللى هاتحس منها ان انا اللى فى المشكلة مش انت ،
عايزك تعرف بس ان ده طبع ، طبع ممكن اكون اتخلقت بيه او الزمن و الوقت و التجارب وصلونى ليه ،
فـ رجاءً تقبلنى كما أنا .
