ليه في ناس بتستمر في علاقات غير مناسبة ؟!(الحب وحده مش كفايه)

[Rena Jesus]

ليه في ناس بتستمر في علاقات غير مناسبة ؟!




واحدة أتخطبت لواحد بيهينها بشكل متكرر و اسلوبه معاها قليل الذوق بس بالرغم من تعبها من الموضوع ده مش عارفة تبعد ؟!..

واحد أرتبط عاطفيا بواحدة دايما بتوقف عن مواضيع تافهة و تديها أكبر من حجمها و بالرغم من كدة مش عارف ينفصل !! ..

كتير بنقرر نكمل في علاقات لا أحنا مستريحين فيها و لا حاسين بالرضا الكافي ، بس ليه ؟!

1- الـ sunk cost effect أو بمعني أصح " الأستخسار " ..
عالم النفس Daniel Kahneman
بيقول أن في ناس كتير بتقرر تكمل في علاقتها اللي مش مناسبها عشان بتستخسر اللي دفعته فيها !!
مش مجرد فلوس , انما مشاعر !
فالشخص اللي تاعبك ده مهما كان انتا حبيته و استثمرت فيه حب و طموح .. عشيت معاه احلام و اماني ..
كل ده بيخليك من جواك تقول حرام الحاجات ديه كلها تترمي في الأرض ..
مع أن الحقيقة أن المشاعر ديه خد في مقابلها سعادة في وقتها و استفاد منها في ادراكه العاطفي و خبرته الحياتية !!

2- الكاتب Richard B. Joelson بيقول في مقالته
5 Reasons People Stay in Unhappy Relationships
أن ساعات بيكون السبب هو أن الشخص بيعند في نفسه !
او بمعني أصح الإنسان بطبعه مش بيحب يعترف بغلطه !
فبالرغم ان كل الدلالات و العلمات و الاشارات بتقول العلاقة ديه فاشلة و حتضر صاحبها !!
بس هو مستمر فيها عشان ميعيش بعد فكدة بفكرة انه غلط في الاختيار الأول !!

3- ممكن يكون في سبب إجتماعي شوية ..
و هو نظرة المجتمع للشخص بعد الإنفصال ..
نظرا لإن الإنسان كائن سطحي و دايما بيهتم بازاي الناس بتبص عليه و حتقول عليه ايه ؟!
.. فدايما بيحسبها إن انا لو قررت انفصل بعد كل الكلام الجميل اللي عمال اقوله علي نفسي في العلاقة ,
بعد صورة السيلفي الكتير اللي اتصورتها و نشرتها في كل حته !!؟
أكيد شكلي حيبقي وحش .. سواء في نظر المجتمع او حتي في نظر الطرف اللي بيحبه اللي ممكن يقول عليه خاين او غدار ..
مع ان اللي بيحبه ده لو فعلا كدة حيعرف ان من مصلحته ميبقاش في علاقة الطرف التاني غير سعيد فيها !!

فببساطة فيه أسباب كتير ان ليه بنفضل في علاقات غير مناسبة لينا ..
مع ان البديهي إن مكان مفيش منه اي امل لازم تمشي منه !
علاقة سبب أنك تعيطي كل يوم لازم تنتهي !
علاقة سبب أنك تبقي في خلافات و خناقات مع كل اللي حواليك لازم تخلص !
علاقة سبب في فشلكوا و تاخيركوا انتوا الاتنين لازم تموت ! ..
بس للاسف القرار مش بالسهولة ديه و في صراعات و حسابات كتير عشان توصل للقرار ..
بس يمكن البداية تكون لما الإنسان يصارح نفسه بالواقع و ميلفش حواليه ..
لما يفكر بطريقة منطفية سليمة من غير اللجوء لعواطف غير ناضجة و تفكير عقيم ..!

ففي النهاية في جملة بتقول
There comes a time in the relationship when you'll realize that love just isn't enough ..
ففعلا في وقت ما بيجي في العلاقات ،، بتكتشف ان الحب وحدة مش كفاية ...


cpd