محاولة مخصصه

[walaa farouk]

ناس معينة ( كتير ) بتقول انا باجي اعاتب حد. بطلع في الاخر انا اللي غلطان. ومش بعرف اخد حقي.وبلاقي نفسي بعتذر للي ادامي في حين ان هو اللي غلطان.

الاول. لازم تعرف ايه اللي بيحصل بالظبط. وبعدين اقولك تعمل ايه.
⬅ اللي بيحصل ان لما حد بيعمل حاجه تزعلك. انت بتغضب جواك.
وبتقول انا لازم اروح اعاتبه. لكنك بتكون خايف جواك من المواجهة دي. لاسباب كتيره. منها انك خايف ان الشخص اللي ادامك يزعل وتخسره.
ف الغضب اللي جواك من الموقف بالاضافة لخوفك من المواجهة. بينتج عنه افراز هرمون ( الابينيفرين = الادرينالين). والهرمون ده بيزود ضربات القلب ( واظن انك بتحس ده بوضوح ). وبيخليك متوتر جدا وبينتج في النهاية ان خوفك بيزيد وتوترك بيزيد.
عشان كده بتحس انك مضغوط جدا وقت العتاب واللوم. وده بيأثر على قدرتك على استيعاب الكلام اللي بيتقال ادامك. وبياثر على قدرتك على اختيار الرد المناسب ( كتير بعد المواقف دي بتقول. انا ليه ماقولتلوش كذا ).
بالإضافة لان عقلك بيبقي عاوز يهرب من كم الضغط الهائل اللي عليه في اللحظة دي. ف بتختار انك تهرب من المواجهة دي وتنهي الحوار حتى لو ماخدتش حقك. المهم مخك يشيل الضغط اللي عليه.