|
 |
 |
 |
|
رقم المشاركة : ( 1 )
22 - 03 - 2017, 05:01 PM
|
|||||||||||
|
|||||||||||
|
من ٥ سنين كان فيه شخص لطيف "مناسب" حابب يرتبط بيا ! في الحقيقة انا ماكنتش معجبة بيه بس "زن" الأصدقاء وقتها خلاني احاول اتعرف عليه وأثناء خروجات عابرة وسريعة لاقتني متخشبه والسبب بسيط ؛ هو كان عنده طريقة "واقفه" جدا في التعامل -رسمي بزيادة- وانا هلهلية بزيادة اضربهم في الخلاط هتطلع كوسة بالكريم شنطيه ! كنت ببقي قاعدة "متكتفة" مش عارفه اتكلم زي ما انا عايزة .... مخنوقة ! وانتهي الموضوع -سريعا جدا- بعد لوم الأصدقاء اللي كانوا شايفينه "لُقطة" ! ---------------------------------------------- اثناء خروجتنا المتعددة كنت اقعد اتفرج "عليهم" ؛ هو وهي .... حلوين اوي مع بعض والاهم مرتاحين مع بعض ! كانت تحكيلي مثلا انها دايما بتوقع اكل علي نفسها وهي بتاكل وفي كل المرات كانت بتواجه تعليقات سخيفة من البشر لحد اما اتعرفت عليه وارتبطوا وجت اللحظة الحاسمة "ما هي لازم هتاكل يعني 😃" ووقعت علي نفسها اتكسفت جدا قعد هو يضحك وقام موقع علي نفسه الاكل عشان يقلل الحرج ! قالتلي "بقيت نفسي اكتر معاه" ..... "مابخافش اضحك زي ما انا عايزة ومابقتش محتاجه ماسكات تخليني اي حد تاني غيري بس عشان يقبلني" ! ---------------------------------------------- كل يوم بنقابل ناس للمرة الاولي ودايما بنحاول نظهر "بافضل" صورة ممكنه ولعل هذه الصورة مش صورتنا الحقيقية لان كل واحد فينا فيه اخطاء ومشاكل -ده طبيعي وعادي جدا- .... ازمة علاقات كتير اننا بنحاول نظهر الأفضل وبعد الارتباط / الجواز نصحي من النوم نلاقي ناس تانيه خالص ! ناس حقيقية كلها اخطاء ومشاكل وشعر منكوش ومن غير مكياج !! اصعب حاجة انك تكون نفسك من غير رتوش ولا فلاتر .... هي الاصعب في مجتمع يدفعك دفع انك تكون اي حد تاني غير نفسك .... فما بالك بقي مع شخص احتمال يكون شريك حياتك ! عشان كده في ظل الزحمة والدوشة الكتير دي قررت اني أكون زي ما انا قدام كل الناس ومع اي شخص خصوصا لو شخص عزيز .... قررت ارتبط بالشخص اللي اقدر اضحك معاه ! اصل الحياة صعبة .... صعبة اوي ! مليانه مشاكل وحمول وهموم ...... مليانه مطبات ونُقر وبلعات ...... الدنيا صعبة اوي ..... ولو في وسط كل ده بقيت مع واحد "بيصعب" هو كمان عليه الضحكة يبقى "بناقص" ! الواحد نفسه في شخص يضحك معاه في الرحلة .... عالرحلة ..... تعرفي انك في وسط كل الضيقة هتروحي تتكلمي معاه وهتحسي انك مرتاحه لانه موجود .... هتحسي انه "ضحكة" في وسط حياة صعبة ... صعبة اوي ! 
|
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| الحياة صعبة قوي |
| الحياة مع ربنا صعبة |
| الحياة بقت صعبة |
| الحياة صعبة |
| الحياة صعبة |
العرض الشجري