مش طالبه هَلك _ خف تعوم

[Rena Jesus]

(مش طالبه هَلك)

من المفترض ان الدنيا في الكتالوج بتاعها ممكن تتعاش بنعومة و مرونة و بساطة ..
بس ده طبعا لو قرينا الكتالوج و اتعاملنا معاها صح و اديناها بالظبط على قدها لا أكتر و لا أقل ..
الخشونة و التصلب و التعقيد و الحرق و الهلك بقى بيحصلوا من سوء استعمالنا إحنا
(مش عيب في الديزاين)
و طبعا بييجي معاهم ألم و تلوث و خنقة و اصوات تخبيط فنبدأ رحلة البحث عن السبب و العلاج ..
معظم الناس بقى بتقضي العمر كله في رحلة البحث دي و كمان بيدوروا بره التوكيل!!

..عايشين بيزودوا زيت عشان يعالجوا الاحتكاك و يرشوا ميه عشان يخففوا الحرق و التصلب و مقضينها تخبيط
الحقيقة كلنا تقريبا بتعدي علينا اوقات من دي..
طريقة الاستعمال الصحيحة بقى ممكن توفر العمر الضايع ده
و توفر الطاقة للحاجات اللي الطاقة اصلاً مخلوقه عشانها.. واخد بالك؟!

- طب أعرف منين؟؟..
أهم و أشهر أعراض "سوء الاستعمال"
هي الحياة باسلوب اصدار الأحكام Judgmental mindset ..
أول ماتلاقي دماغك شغالة أحكام على نفسك أو اللي حواليك اعرف ان في حاجة غلط..
الأحكام دي ممكن تبقى على المظاهر و الصفات و الأحداث و الأفعال و حتى على النوايا ..
ساعات تبقى أحكام سلبية (انتقاد و لوم و شكوى)
و ساعات بتبقى أحكام ايجابية (اعجاب زايد و انبهار و تريبّات)
وقت ماتلاحظ ده اعرف ان في حاجة ((جواك)) محتاجة تتظبط في طريقة التعامل مع الدنيا ..
محتاج تشتغل على المرونة، و النعومة و البساطة يعني ..

- طب ازاي؟؟
خف دماغك شوية على تفاصيل دنيتك و ظبط توقعاتك منها و نظرتك لأهميتها و إحساسك بأحداثها..
يعني خليك خفيف في خطوتك،
ممتن للي بييجي في دنيتك،
عدي على الأحداث من فوق،
خليك لامسها بس مش دايس عليها و اجمع الحِكَم منها و افهمها..
متتوقعش فيها راحة غير مبررة و لا تتوقع فيها كرم وعدالة غير مؤكدة..
افصل نفسك شوية عنها و روح بعقلك أماكن و أحوال تانيه مهمة و انشغل بيها..
صلّي و ادعي وأتأمل و فكر في المعاني و عيش شوية من الوقت بدماغ طفل حر عايز يتعلم و يفهم مش دماغ مسجون عايز يهرس و يعجن في كل الأحداث اللي جوه زنزانته..

الدنيا قصيرة أوي متستناش منها حاجات دايمة، و متقلبة أوي متطّمنش لوضعها حواليك..

كن_في_الدنيا_كأنك_غريب_أو_عابر_سبيل
خف_تعوم