حلم كل طفل صغير

[walaa farouk]

العجلة اللي بسندّات حلم كل طفل صغير، وعشان كده لما ابني كان صغير جبناله عجلة صغيرة بسندّات وكان فرحان بيها اوي وبيركبها ويلعب بيها كل شوية لكن بعد كام شهر باباه قرر يعلّمه ازاي يسوق العجلة من غير سنداّت، وشال واحدة من السندات وكان بيمشي جمبه عشان يساعده ومايوقعش لكن ابني كان زعلان أوي وكان حاسس ان باباه عايز يضايقه! وبعد فترة شلنا كمان السندات التانية وبقيت العجلة من غير سندات خالص وبدأ ابني يقع وباباه يساعده ويقوّمه لكن كان بيعيط في كل مرة يركب العجلة وكان زعلان اوي مننا وحاسس اننا مش بنحبه ومبسوطين انه زعلان وبيعيط ،لكن الإحساس ده اتغير لما جبناله عجله اكبر واحسن لانه اتعلم ازاي يسوق العجلة لوحده وكان واثق في نفسه لانه عرف ان باباه ساندُه ومش هايسيبه..

لما المشاكل تزيد والشغل اللي كنت محتاجه يضيع ويمكن كمان الفلوس تخلص ومايكونش عندك احتياجك وحتى اقرب الناس يختفوا من المشهد، اعرف ان ربنا بيكسر كل عكاز ضعيف بتتسند عليه عشان يكون اتكالك عليه هو، يكون هو بس السند ليك ومتخافش هومش هيسيبك في وسط الطريق..