ماما بتزعق من غير صوت

[walaa farouk]

اتعزمت ع الغدا عند واحده صاحبتي واخدت ولادي معايا عشان يلعبوا مع ولادها و احنا ع السفرة جت قعده بنتها(7سنين) جنبي .. مامتها بصت لها بصه تحذيريه😒 بدون سابق انذار و ابتدت تحط لها اكل ف الطبق و تديهولها و البنت وشها احمر و كاتمه العياط 😟و الهدوء سائد ابتدت تاكل فانا مديتش اهتمام و ابتدينا ناكل كلنا بعد دقيقه بصيت ع البنت لقيت دموعها نازله صامته 😢و بتاكل كميات قليله جدا و كانه الاكل مش عاجبها .. الام لما لاحظت اني شفت اتوترت اكتر 🙃و قالتلها بغيظ مكتوم (كلي) 😒البنت قالت (حاضر) مقدرتش امسك نفسي حطيت ايدي علي كتف البنت 🤐و قلتلها فيه حاجه ف الاكل مش عاجباكي و لا انتي شبعانه و بصيت في عنيها
قالتلي لا ... التليفون رن الام قامت ترد
قلتلها مالك بتعيطي ليه قالتلي خايفه😔 قلتلها من ايه طب نتكلم بعدين لوصول الام
هديت شويه من مجرد كلمه مالك و اكلت نص طبقها و الام عشان متوترة جدااااا قالتلها قومي اغسلي ايديكي و سنانك و انا عملت مش واخده بالي
اثناء الام ما بتعمل القهوة لقيت البنت قعدت جنبي في مسافه اقرب من الطبيعي ف سالتها انتي قلتيلي خايفه .. خايفه من ايه 😔
قالتلي انا باخاف من ماما اوي لما بتزعق 😟و عشان كده بعيط 😢مش باعرف اتعلم اكتم العياط
قلتلها بس ماما مزعقتش .. قالتلي لا يا طنط ماما بتزعق من غير صوت عالي 😓
قلتلها هي خايفه عليكي و بتحبك و عاوزاكي تاكلي كويس و انتي فعلا خاسه اووي ليه مش بتاكلي زي زمان عشان تبقي قوية و ذكيه
قالتلي انا قلت مع نفسي بلاش اكل غير لما اجوع اوي اوي و مقدرش استحمل الجوع 😦
قلتلها ليه 😰
قالتلي عشان لما ماما بتوديني لدكتور السنان بتوجع اوي و مش باقول و بابقي ساكته و هو بيقولي اني شاطرة👍 و ماما مش بتسالني عندي وجع و لا لا .. انا باستحمل بس بابقي خايفه .. باخاف اكل لا سناني تسوس تاني .. قلتلها قلتي لماما كده قالتلي لا مش هاقولها و انتي اوعي تقولي👀 يا طنط .

عدي اليوم و اتلككت لمقابله فردية مع صاحبتي و حكيتلها القصه بعد تغيير ما يلزم علي انها حاله من حالات تعديل السلوك عندي 😸و قلتلها جوة السياق تعمل ايه ... بعد شهر قابلت البنت تاني ابتسمتلي احلي ابتسامه 👧و كانت متفتحه و جميله و قالتلي انا بحبك اوي يا طنط 😍.. قلتلها و انا كمان 😘
قالتلي عارفه ليه .. عشان انتي خليتي ماما بقت لطيفه اوي و بتلعب معايا😃 و بتمسك ايدي و انا عند دكتور السنان قلتلها مين قال كده قالتلي هي قالتلي انك علمتيها الالعاب اللي بتلعبها معايا والحواديت اللي بتحكيهالي 😍😍😍

سيبوا ولادكم يعبروا عن مشاعرهم .. سيبوهم يقولوا اللي حاسينه من وجهه نظرهم الصغيره .. دعموهم ساعدوهم يطلعوا اللي جواهم و يسموه اسم و يعرفوه .. صدقوهم و خدوا الكلام منهم علي سجيته .. الطفل مبيعرفش يتآمر عليكي

اوعي وجودك مع ابنك في وسط ناس يخليكي مضغوطه او متوترة او محرجه .. مش لازم كل حاجه تبقي صح .. الناس دول شخصيا مروا باللي انتي فيه و اكتر و اسوء منه

ابتسمي في وش طفلك و تعاطفي مع ألمه الجسدي و النفسي و حسسيه انك مشاركاه فيه و انك مريتي ب ده قبله و مقدرة احساسه

لما تودي ابنك للدكتور لو فيه الم في الزياره لازم تقوليله و تشرحيه علي قد حجمه مش تقولي دي حاجه بسيطه و انت بتتدلع و لا تسيبيه يواجه الامر الواقع

اخيرا احضنوهم و بصوا في عنيهم هتاخدوا منهم حب هتبقوا طايرين بيه و هاتحسي انك ملكتي الدنيا باللي فيها 😃

#بالهداوة_مش_بالقساوة
#اكسر_دايرة_العنف