شخصية بنتك اهم من درجاتها!!!!!!

[Rena Jesus]

النهارده وانا باجيب بنتى من المدرسه لاقيتها واقفه مستنيانى سرحانه..مهمومه..مطفيه..اول مره اشوف على ملامحها الحزن ده كله..
افتكرت واحنا بنذاكر امبارح لما انفعلت عليها وزعقت جامد..
وافتكرت لما حكيتلى ان فيه ميس اديتلهم حاجات يحلوها فى الفصل وتانى يوم وزعت عليهم الورق واللى جايب نمره حلوه اديتله ورقته اما اللى جايب نمره وحشه قطعتله ورقته قدامه وقدام كل الفصل ورميتها فى الباسكت!!

افتكرت ازاى ان كلنا بنزعقلها عشان المذاكره..
افتكرت انها بتيجى من المدرسه تتكفى على الواجب وبعد الواجب مذاكره عشان امتحان او مراجعة او تسميع اليوم اللى بعده..
افتكرت ان حتى الاجازه الجمعه والسبت.. بنقضيها كلها..كلها..مذاكره!!!
افتكرت ازاى ان المدرسه فارضه علينا يوميا امتحانات واحيانا امتحانين وتلاته فى اليوم وكل ميس يقولولها عندنا امتحان اليوم ده تقولهم" ماليش دعوه"!!!!!

وزعيق..زعيق..زعيق..
لما اسمعلها والاقيها ناسيه مرادف من التلات مرادفات اللى لنفس الكلمه!!
لما اذاكرلها طول الاسبوع والاقيها جايبه نمره مش حلوه بعد ده كله وصاحبتها اللى بتاخد درس مع الميس جايبه نمره احسن ومامتها مش عاجبها النمره كمان!!!!
لما الميس تسالها على حاجه وماتعرفش!!
لو اتكلمت فى الفصل والميس واقفه!!

انا كده باخسر بنتى..وصحتى ..وحتى بنتى التانيه باخسرها كل مره ازعق لاختها قدامها والاقيها بتجرى تستخبى منى..
بنتى كده بتتكسر قدام عينى..الوزاره بمناهجها والمدرسه بنظام امتحاناتها والمدرسات باسلوبهم فى التعامل بيضغطوا على وانا باضغط عليها..بنتى كده بتنكسر..بتشيل حمل فوق طاقتها..

انا قررت.. مش هاتنرفز عشان نمرة امتحان جت وحشه..
مش هازعق لو نسيت مرادف كلمه او مضاد او جمع او مفرد ..
مش عاوزه نمره نهائيه وتبقي من المتفوقين..المهم ماحدش يكسرها..ماحدش يعقدها من العلم والتعليم والثقافه ..






يا كل مدرس وكل مدرسه
من فضلكم بلاش تكسروهم..بلاش تعقدوهم..بلاش تجرحوهم..
مش عشان تعمل كونترول وتضرب كارت ارهاب تسيطر بيه على فصلك يبقي تجرح ولادنا او تحطم معنوياتهم وتثبت جواهم احساس انهم فشله ..
مش عشان عاوز تدى درس يبقي تعقد العيال من مادتك..اللى عاوز ياخد درس هاياخد درس حتى لو شرحت بصبر وامانه فى الفصل..
لو ماعندكش صبر فى التعامل مع اطفال بلاش تدرس..دى اكتر مهنه فى العالم عاوزه صبر وحكمه ومحبه..لان مستقبل الطفل فى ايدك لو كرهته فى ماده هايتعقد منها وهايتغير مستقبله كله..
لو عندك مشاكل فى البيت ابوس ايدك ماتطلعيهاش على عيالنا..

يا كل أم وكل أب
بنتك لها شخصيه مميزه..طبيعتها انها صوتها عالى..
بتحب الغناء والاوبرا والتمثيل والرسم...
بتحب كل الناس..عمرها ما أذت حد..ولا قلت ادبها على حد ..
احيانا بتهيبر بس ده لما تكون موجوده مع ناس بتحبهم..
بلاش تطفيها ولا تكسرها عشان ترضى حد او عشان ماسمعش تعليق او توجيه من حد...
او عشان تجيب درجات عاليه