عمى الوان

[walaa farouk]

معروف عن الراجل ان عنده عمى ألوان .. بيشوف تقريبا الالوان الرئيسية بس ( أحمر ، أصفر ، أزرق ، أخضر ) ده اخره ياعنى ويوم مايبقى مجرم اوى ممكن يعرف اللون الفوشيك .. لكن المرأة ممكن تشوف فى لون زى اللون الأحمر بس 99 درجة منه .. اخر حاجة سمعتها كانت المارونى ! :/
كمان بالنسبة لمشاعر الراجل تقريبا بيحس بأربع مشاعر رئيسية ( فرحان ، زعلان ، غضبان ، خايف ) ومابينهم كام درجة محدودين من المشاعر .. لكن بالنسبة للمرأة مستحيل اربعة ديه أكيد انت بتهزر .. لان ممكن شعور زى الفرح ده يكون داخل مع الخوف متشقلب مع الغضب فى نفس ذات الوقت .. او بين الفرح والزعل مشااااااااعر كتير جايز هى ماتقدرش تعبر عنها بسهولة بس بتحسها .. تسألها طب انتى زعلانة ؟ لا .. طب فرحانة ؟ لا برضو .. طب ايه ؟ مش عارفة
علشان كده الراجل يقدر يفهم مشاعره ويتفاهم معاها بسهولة نسبياً عن المرأة .. لان المرأة مش محتاجة تفهم مشاعرها بقدر ماهى محتاجة حد يحس بمشاعرها اللى هيا ممكن ماتكونش عارفه لونها ايه .. أو على الأقل تتقبل مشاعرها زى ماهى حتى لو كراجل عندك عمى ألوان
انت عليك تفهم مشاعر اللى قصادك .. واتعامل معاها .. ولو ماقدرتش .. اقبلها زى ماهى .. ولو ماعرفتش قول انا مش عارف .. وإبدأ إتعلم .. ولو ماتعلمتش ؟ .. إتعلم تانى بلاش دلع .. ماتفضلش اعمى العين والقلب
لان عمى الالوان مابيعملش المشاكل .. لكن الكارثة فى عمى المشاعر