"حكاية كذبي و أشواقي"

[روشا الفرفوشه]

"حكاية كذبي و أشواقي"
طِلّ من المَفارق
يا حبيبي اللي مفارِق،
ومروق ع دربي شويّ
مع النسيم اللي مارِق،
خبِّرني إنّك إلي
وغازلني عالهدا،
قطفني عنقودي حِلي
وعطرو تايه بالمدى،
خطفلَك شي بَوسي بدربَك
تركها بين قلبي وقلبك
وأوعا تخبِّر حدا...
صرلي شهور عَمبُنطُر
إلمَح بالسر خيالَك
بلكي عا بالَك أخطُر
ولاقي حالي بِحالَك،
بخصلة شعرَك تحملني
وبلا وعي تغمُرني
وننسى حالي وحالَك...
من كِتر ما كتبِت صارو
عبيسألوني الوراق
وينو انقطعِت أخبارو
شو قولَك بطَّل يشتاق،
إضحَك عا وراقي وقِلُّن
إنَّك عبُكرا جايي
يصدّقو إنَّك راجِعلُن
والأغرب صدِّق حالي!
وبيني وبين كذبي حكايي
حروفها انكتبت بكّير
إنتَ بعيد ومَنَّك جايي
عا قلبي اضحكت كتير
بالماضي قدرِت أشواقي
تكذُب عا حبر وراقي
وهلَّق قِربت النهايي
حبل الكذب قصير.