لكل بنت داخله سنه أولي جامعه .. شوية نصايح لوجه الله :

[Rena Jesus]

لكل بنت داخله سنه أولي جامعه .. شوية نصايح لوجه الله :



..
خليكي علي طبيعتك .. مالوش أي لزمه انك تشتري 20 طقم و 30 علبة make up
انتي رايحه تدرسي مش نازله تشقطي عريس ..

اول اسبوع هتشوفي مناظر زي الفل ..
اللي لابس قميص مشجر علي بنطلون جينز .. واللي لابس قميص جينز علي بنطلون مشجر ..
متتخضيش خالص .. الكائنات دي أليفه مبتأذيش ..

متقعديش ف الكوافير 5 ساعات و قدام المرايه 5 زيهم و 5 عليهم ف المانيكير والباديكير و رسم الحواجب ..
مجرد ما هتنزلي من المترو هتلاقي نفسك قالبه علي هبه رجل الغراب ..
وخصوصآ لو كنتي رايحه جامعة حلوان ..

لو ولد سألك علي مدرج او ميعاد محاضره او حاجه تخص الكليه ..
متتكسفيش ووشك يحمر وتفتكريه جاي يعترف بحبه ليكي ..
نصفي النيه من أولها ..

لو شفتي واحده ضاربه شعرها اكسجين .. و لابسه نضاره شمس سودا وكعب عالي ومتقمصه دور مي عز الدين ف عمر وسلمي .. متتفاجئيش
دي صاحبتك بس استحمت ..

حاولى متنزليش اول يوم .. اول يوم بيبقي يوم الشقط العالمي ..
وخصوصا مع ولاد الدفعات اللي قبلك ..
كل واحد فيهم بيبقي جاي يتفرج علي بنات الدفعه الجديده .. ويشوف هيختار مين علشان يصاحبها ..
اقعدي ف بيتك اكرملك وانزلي بعدها ب كام يوم ..

الولد اللي ييجي يقولك كام كلمه محفوظين زي :
هو انتي بتدوري علي حاجه - انا ممكن اساعدك - انتي شكلك دفعه جديده - انا شفتك فين قبل كده - لو احتجتي اي حاجه قوليلي
غالبآ ده الكائن النحنوح اللي ف الكليه .. اهربي منه بسرعه عشان بيلزق ..

الجامعه دنيا جديده .. فيها الكويس والوحش ..
فيها اللي رايح علشان يحقق حلم واللي رايح علشان يضيع وقت ..
فيها صحاب هتعرفيهم ويكملوا معاكي حياتك كلها ..
وصحاب مصالح لابسين وشوش

ف الجامعه هتسمعي كلمة بحبك اكتر من كلمة ازيك .. خليكي عاقله وواعيه ..
وعودي قلبك يفلتر كل كلمه بيسمعها .. وميصدقش اي وعد يتقال ..

ف الجامعه 4 سنين من عمرك .. لو عشتيهم صح هيكونوا اجمل 4 سنين ف حياتك كلها ..
وعلشان يكونوا فعلا اجمل ايام حياتك :
حطي قصاد عينيكي ربنا .. وحلمك .. وثقتك ف نفسك

''مينا مجدي''