من فتره ..
كنت قاعد مره مع شويه كدا من صحابي كان فيهم واحد لسه خاطب جديد ..
فضلنا نتكلم معاه عن تفاصيل الخطوبه وشافها فين وكدا ..
فلما حكي فواحد من صحابه اللي كانو قاعدين قال انه يعرفها ..
وطلعت منه كلمه عفويه كدا علي ان البنت "مش جميله" وانه هو احلي منها ..
كلنا بصيناله جامد اوي .. وزميلنا اللي خطب جديد ده وشه احمر كدا ..
بس رغم محاولات صاحبنا اللي حاول يلم الدنيا بعد ما حس انه عك ..
لقينا صاحبنا اللي خطب ده ابتسم كدا
وقاله.."انا خطبتها عشان بحبها ..
مش عشان هي حلوه او عشان هي غنيه او عشان هي احسن بنت فالدنيا ..
انا كان ممكن اروح اختار واحده علي مقايسك انت حلوه وزي القمر
بس مالاقيش نفسي وسعادتي معاها ..
احنا بنحب عشان نرتاح .. عشان نلاقي سعادتنا لاول مره مقسومه نصين.. نص عشان احنا سعدا ..
والنص التاني عشان نصنا التاني شايفينه قصاد عيونا سعيد عشان معانا.."
عمر البنت بالذات ماكانت تتحب بس عشان جميله ..
اللي يحب بنت بس عشان شكلها عجبه يبقي ضيع علي روحه سعاده مش هيدركها عمره ولا هيحس بيها ..
البنت روح وشخصيه واحساس وسعاده ..
بهجه بتدخل حياتك وتلونها وتديها طعم ..
اللي وقت ضيقك تسندك وتخاف عليك ..
اللي لو امك جرالها حاجه تكون هي ليك الام والاخت والصاحبه ..
اللي لو كله وقعك وداس عليك حسها فحياتك يقويك ويقومك علي رجليك ..
اللي يوما ما.. تاخدها فحضنك وتغمض عينيك..
وتقول "الحمد لله ان ربنا رزقني بيكي..ورزقني حبك"
