دى حكاية عمرى وأيامى (حكايتى مع منتدى الفرح المسيحى) فى العيد السابع للمنتدى العظيم

[nasser]

حكايتى مع منتدى الفرح المسيحى

أخوتى الأحباء
كل سنة وانتوا طيبين
فى العيد السابع للمنتدى عندى كلام كتير عايز اقوله عايز احكيلكم حكايتى وقصتى مع منتدانا العظيم:
مش عايز اقول أو عايزين نقول احنا قدمنا ايه للمنتدى أو قدمنا موضوعات ايه أو صور ايه لأ لأ عايزين نقول أو عايز اقول المنتدى قدملنا ايه أو قدملى ايه ومهما قدمت موضوعات أو صور مش هاتكون إلاّ حاجة بسيطة أمام ما قدمه المنتدى ليّا.
هذا الصرح العظيم أنقذ ناس كتير من الضياع والفراغ.فى قصص كتير لناس كتير لسه متقلتش ومحدش حكاها وهتتعرف ف يوم ما. ما فعله منتدى الفرح المسيحى لناس كتير سواء أعضاء أو زوار.
بالنسبالى أنا منتدى الفرح المسيحى رجّعنى تانى للخدمة وأيامها الجميلة.
أنا خدمت ف كنائس كتير فى مدارس الأحد والدورات الرياضية والألعاب الترفيهية والحفلات والمسابقات لكن للأسف فى لحظة ما غلطت غلطة العمر وتركت الخدمة مع خدام كتير بحجة الانشغال بالحياة الجديدة رغم ان أب اعترافى ترجانى وقاللى هاتندم لكنى كنت عنيد ومسمعتش كلامه ومع مرور السنين حسيت بغلطتى الكبيرة.
لكن ربنا مسبنيش وف يوم من الأيام كنت على النت ولقيت فرحتى الكبيرة وهى(الفرح المسيحى)
لأنى كنت زعلان خالص لأنى طول عمرى فى الخدمة ومقدرش ابعد عن الخدمة وأنا باخدم من أيام ما كنت ف الجامعة ولما تركت الخدمة بسبب عندى وكبريائى حسيت ان فى حاجة ناقصانى علشان متربى فى الخدمة طول عمرى.
ولقيت فرحتى منتدى الفرح المسيحى...استفدت كتير من المنتدى ومهما قدمت موضوعات مش هاتكون إلاّ نسبة ضئيلة من اللى قدمهولى المنتدى الجميل...أنا لما باغيب عن المنتدى بأحس انى مش فى حالتى وفى حاجة ناقصانى وبأحس ان كل ساعة غايب عن المنتدى أو أى أيام غايب فيها عن المنتدى بأحس انها أيام ضايعة من عمرى ودى حقيقة بجد لازم تتقال.
المنتدى رجّعنى لأيامى الجميلة أيام الخدمة فى الكنيسة والنادى واتعرفت على أحسن وأعظم خدام وخادمات...اتعرفت على خدام وخادمات قلبهم أبيض...اتعرفت على ناس باحبهم وبيحبونى..منتدى الفرح المسيحى هو عمرى وأيامى اللى ماقدرش ابعد عنه أبداً.
وكل سنة وانتوا طيبين يا حبايبى