20 سر من خبراء التجميل لمكياج مثالي زي المحترفين

[marit jesus]

كلنا بنتمنى اننا نعمل مكياج زي المحترفين ويطلع مكياجنا زي النجوم والمشاهير وطبعا هما مكياجهم بيبقى مثالي لانه بيكون معمول من خبراء تجميل ومتخصصين في المكياج, والنهاردة احنا جايبين لكل بنات حوا 20 سر من خبراء التجميل عشان تعملي مكياج مثالي ويطلع زي المحترفين.

– 20 سر من خبراء التجميل لمكياج مثالي:
1- اول حاجة اختيار درجة لون كريم الاساس يكون مناسب لدرجة بشرتك لان الاساس ده هو اللي هيترتب عليه المكياج كله لو اختارتي لون غلط هيطلع المكياج كله مش حلو, وزي ما قولنا قبل كده لما تيجي تختاري كريم الاساس جربي الدرجة على الرقبة, كمان اختيار الكونسيلر عشان تختاري الكونسيلر صح جربي درجة اللون على ضهر الايد او المعصم خدي كمية صغيرة وافرديها على البشرة واستني لمدة دقيقة عشان تشوفي اللون بعد ما يندمج مع حرارة بشرتك .

اعرفي من هنا انواع كريم الاساس المناسبة لكل بشرة وازاي تحطيه صح.

2- لو انتي مش قادرة تختاري الوان المكياج المناسبة ليكي او مش متأكدة بالظبط ايه المناسب ليكي, يبقى الافضل تعتمدي على الالوان الفاتحة في المكياج هتنور بشرتك وهتدي لوك طبيعي.

3- عشان نتخلص من الارهاق والهالات السودا تحت العين استخدمي كوركتوراو كريم تصحيح لون البشرة يكون افتح من لون بشرتك, وبالنسبة لالوان الكوركتور اللون البينك او الوردي استخدميه عشان تداري اللون الازرق تحت العين هيداريها ويدي لون ضي دهبي حلو.

اعرفي من هنا ازاي تستعملي كريمات تصحيح لون البشرة.

4- بالنسبة للبودرة في بنات كتير بيقعوا في غلطة بيجيوا البودرة افتح من لون البشرة لكن ده غلط لان البودرة مش للتفتيح البودرة عشان تثبت كريم الاساس, عشان كده البودرة المفروض تكون نفس لون البشرة, وفي الصيف الافضل كمان نختار لون بودرة اغمق من لون البشرة عشان تدينا اللوك البرونزي اوالتان بتاع الصيف.

اتعرفي من هنا على انواع البودرة وازاي تختاري اللي يناسبك.

5- لو عايزة تبيني بشرتك اغمق او كانك عاملة تان اختاري لون بلاشر اغمق من اللي انتي متعودة تستخدميه.

6- ممكن تستخدمي درجتين من الوان البلاشر او احمر الخدود عشان تحددي الوش وتنوريه اكتر وانسب طريقة عشان يطلعوا حلوين مع بعض انك تختاري لون غامق لتحديد ملامح الوش, واللون التاني يكون فاتح عشان يدي ضي وينور الوش.

اعرفي من هنا ازاي تحطي البلاشر حسب شكل وشك.

7- لما نيجي نعمل مكياج العين ونختار الالوان ناخد بالنا ان الالوان الفاتحة بتدي العين شكل اكبر وبتظهر العين, والالوان الغامقة بتدي حجم اصغر للعين.

شوفي من هنا ازاي تختاري رسمة العين المناسبة.

8- لما نيجي نرسم الايشادو ندمج ما بين لونين او تلاتة في نفس الوقت, نحط اللون الفاتح تحت الحاجب, واللون المتوسط على الجفن المتحرك كله, واللون الغامق على الزاوية الخارجية للعين.

اعرفي من هنا طريقة رسم الايشادو بالخطوات .. وازاي تختاري اللي يناسبك .

9- عشان ندي حجم اكبر للرموش ونخليها تبان كثيفة اكتر نستخدم الايلاينر وقلم العين ندمجهم مع الايشادو عشان تدي لوك كثيف اكتر للرموش.

10- لو انتي محتارة في اختيار الماسكارا يبقى انسب حاجة والافضل عشان تضمني ان اللوك يطلع حلو اختاري الماسكارا السودا اللي بتكثف الرموش.
11- اختاري الماسكارا تكون مناسبة للون عينكي عشان تطلع احلى, بالنسبة للعيون الزرقا والرمادي انسب لون ماسكارا ليها هي البني, ولون العيون الخضرا والبني انسب لون ماسكارا ليها الرمادي والرزقا.

اعرفي ازاي تحطي الماسكارا صح.

12- عشان تدي ضي حلو للوش احرصي انك تحطي الروج او احمر الشفايف حتى لو مش حاطه ميك اب خالص, الروج لوحده هيدي لوك حلو وهينور الوش.
13- استخدمي قلم تحديد الشفايف عشان تقدري تتحكمي اكتر في الروج والرسمة تطلع مظبوطة وهيبرز شكل الشفايف, وكمان عشان تحافظي على الروج اكتر وميطلعش بره حدود الشفايف.

14- لما نيجي نختار درجة لون قلم تحديد الشفايف نختاره افتح من لون الروج بتاعنا, او يكون شفاف يعني لون الشفايف بالظبط, او بالوان الباستيل الفاتحة.

اعرفي طريقة تحديد الشفايف زي المحترفين.

15- انسب طريقة عشان نحط الروج بطريقة صح, نحطه بالفرشة وبعدين نجيب منديل نضغط بشفايفنا عليه عشان نشيل اي زيادة وبعدين نحط طبقة روج تانية , والطريقة دي هتخلي الروج يثبت معاكي فترة اطول.

16- اختاري لون الروج المناسب للون بشرتك, وزي ما قولنا ممكن تحطي الروج بس حتى لو مش حاطة ميك اب عشان تنوري الوش.

اعرفي ازاي تختاري الوان الروج اللي تليق على لون بشرتك.

17- لو حاطه روج بلون فاقع او تقيل يبقى تحطي مكياج العيون بألوان خفيفة, والعكس لو حاطه لون روج فاتح يبقى تحطي مكياج عيون بالوان غامقة, لان التركيز لازم يكون على منطقة واحدة بس في الوش.

18- نختار لون احمر الشفايف يكون ماشي مع لون مكياج العيون عشان يبقى في تناسق في اللوك.

19- ملمع الشفايف ممكن تحطيه على الروج عشان تديه لمعه حلوة, او تحطيه لوحده على الشفايف لوعايزة لوك طبيعي.

20- عشان تبيني الشفايف بحجم اكبر او ممتلئة ممكن تعملي خدعة بسيطة وهي انك تحطي ملمع الشفايف في نص الشفايف اللي فوق واللي تحت ده هيديها لوك اكبر.