|
 |
 |
 |
|
رقم المشاركة : ( 1 )
16 - 08 - 2016, 05:28 PM
|
|||||||||||
|
|||||||||||
|
الصدمات/ الشئ الوحيد القادر على تغييرك 180 درجة،
بغض النظر عند درجة ايمانك بالله و قضائه و قدره، الصدمات بتسحب روحك الحلوة اللى كانت فيك، بتحوّلك لـ بنى آدم أنت مكنتش حابب تكون فى القالب بتاعه! الأحداث اللى بتحصل خصوصاً بدون مُقدمات.. - المشاعر الممزوجة بـ الحُزن، القهرة، الرعشة و أمنيّتك أن كل اللى بيحصل يكون مُجرّد حلم! - خوفك من نفس المشهد لا يتكرر تانى، و يتكرر نفس احساس إنعدام الإرادة و فُقدان القوة على أنك تعمل أى حاجة أو توقّف كل اللى بيحصل! - ردود أفعالنا أحياناً بتبقى غير متوقعة، خصوصاً على الأحداث اللى عُمرك ما تخيلت أنها تصير معاك.. - اللى بيطلع يجرى فى الشارع و يعيّط زى المجنون، اللى يدخل أوضته يكسّر و يحدّف و يلعن كل اللى حواليه، و اللى يبُص للسما و يقول لـ ربنا " أنت ليه ظلمتنى كدة! "، اللى بيقرر أنه لازم يقف على رجله و ياخُد العزاء بدون ما تنزل منّه دمعة واحدة.. مع أن كلهُم سمعوا خبر وفاة حد من أهلهم! - البنات اللى بتحصلّها حوادث الإعتداء، الإغتصاب أو التحرش.. منهُم اللى بتفرد دراعها و تقرر تتكلم، و منهُم اللى بتروح تقعد على الأرض فى آخر أوضتها عشان تعيّط و تندِب حظها! - الناس اللى بيحصلّها حوادث بتسيب علامات و بروز فى جسمها، فى اللى بيُقف قدام المراية و يبُص للبروز دى و يبتسم و يحمد ربنا أنه لسة على قيد الحياة، و فى اللى بيفضل مستخبّى من الناس و كل ما يشوف جسمه يعيّط! - الست اللى بتعرف أن اللى قلبها حبه خانها مع أقرب صديقة ليها، منهم اللى بتروح تاخُد حقها بـ دراعها، و منهم اللى بتتكسر و يفضل عندها مشكلة فى الثقة.. - الناس اللى بتختفى فجأة من حياتك.. فى اللى هيقول أن العيب مش فيّا و اللى راح ييجى غيره، و فى اللى هيقعُد يحاسب نفسه على غلطات يمكن هو مرتكبهاش أصلاً! - كلنا بنتعلّم، كلنا بنتعايش.. بس كلنا عايشين بنفس الذكريات و المشاهِد.. كلنا عندنا نفس المشهد اللى مش بيتنسى، اللى بيجيلك فى كابوس و يقوّمك مفزوع، اللى فى عز فرحتك لو جه قدام عينك هيخلّيك تقلب وشّك، المشهد اللى أنت مخبيه و مش عاوز تعترف أنه نقطة ضعفك، المشهد اللى لو عايش أنجح حياة عملية راح يكون هو مُشكلتك النفسية! - رفقاً بالناس اللى اتعرضت لـ صدمات يا جماعة.. مقدرة قوة و تحمُل كل شخص مش زى التانى، مش كل واحد مؤمن بالله و بـ قضائه و قدره بـ نفس درجة ايمانك.. اتحملوا الناس اللى بتخاف، اللى وشها بيتقلب فجأة، اللى بتصحى من النوم مش طايقة نفسها، اللى بيسرحوا كتير و دماغهم و عنيهُم بتروح لمكان تانى، حتى اللى بيضحكوا كتير فى الأوقات اللى أنت متوقع منهُم رد فعل غير.. اتحملوا الناس، عشان انتوا متعرفوش هما شايلين ايه فى دماغهُم.. Mirette Jamal! 
|
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| يا رب أنت الوحيد القادر على انتشالنا |
| هو الوحيد القادر ان يحملكم |
| الوحيد القادر علي أن ينقذك |
| الوحيد القادر على فهمنا |
| هو أن تحب الشخص الوحيد القادر |
العرض الشجري