لو عندك كلمة حلوة قوليها وكترً خيرك ........معنكيش ييبقى .........

[Rena Jesus]

الحامل
- مش مستنية حد يعلًق علي وزنها.

- مزاجها متقلًب، غصب عنها.

- زهقت من جملة " الحقي ناميلك شوية " لانها اصلا مش عارفة تنام دلوقتي من الحموضة و التقل و الشلاليت..

- محدش يستهتر بتعبها...❤

- عارفة ان مناخيرها منفوشة.. مش محتاجة كومنتك اللطيف!

- عارفة ان وشها و جسمها منفًخ..احتفظي بالمعلومة العسل دي لنفسك.

- الحامل خصوصاً لأول مرة بتفرح بكل لحظة بطنها بتكبر فيها و لو تنتوفة...
سيبوها تعيش الفرحة دي من غير تريقة من اللي حواليها..

- هي عارفة ان مقاس رجلها نطً 3 نمر...شكراً علي الاضافة...

- بتزعل اوي لو حد لقاها بتاكل و علًق علي اكلها او كميته..

- جملة " ايه ده تصدقي معرفتكيش و انتي حامل " دمها يلطش!!
هي ماتحولتش لخرتيت عشان متعرفيهاش يا ظريفة!!!

- بتبقي حساسة بزيادة..ده شغل هرمونات مش ذنبها.

- فرحانة بالبيبي زي ما حضرتك كنتي مستنيه بنتك بلهفة فا متكسريش فرحتها بإن اللي جاي سواد و سهر و مرمطة!!

- مستنية كلام ايجابي مش كلام يرعبها.

- " انتي شوية و هتتدألجي....انتي ناقص تاكلينا...."
كل ده قلة ذوق مش هزار...

- "وشك اصفر ليه كده" و ملامح وشك انك هترجعًي برضه قمة قلة الذوق...
اتطمني عليها من غير ما ترعبيها.

- الولادة بالنسبالها بعبع، ياريت تهديها و تطمنيها.
مش كل كلامك معاها عن كوارث في الولادات و مصايب تشًيب..

- في المرحلة دي اختيار " اسم البيبي" اهم حاجه في حياتها يا تشاركيها بحب يا تسكتي....
انتي كنتي كده برضه. الموضوع مش هبل زي ما بتقوليلها. دي غريزة أمومة...

- محدش ليه الحق يحاسب الحامل هتولد طبيعي واللا قيصري و يديها محاضرة تسم بدنها...
ده قرار دكتور و قرارها..

- الحامل مش مستنية حد يقولها هتخسي كل ده ازاي بعد الولادة..
كل حمل و ليه ظروفه..

- الحامل بتبقي وخمانة و تعبانة و كل ساعة بحال..
قدًري ده و بطلي تحسسيها انها مقصرة طول الوقت معاكي،
انتي في حملك محدش كان بيشوفك..

- ما تزًنوش في سؤال " ها ولد ولا بنت "
خلوا الناس براحتها.

- ما تزعلوش لو عرفتوا ان واحدة حامل بعد 3 شهور...
محدش عارف هي تعبت قد ايه او سقطًت كام مرة لحد ما حمل ليها ثبت
..نلتمس الاعذار..

- لو أم و اب مقتنعين بإسم اختاروه ياريت ما تكريههمش في الاسم...ده ابنهم هما...
باركي من سكات طالما محدش طلب رأيك.

- بلاش للمرة المليون جملة " انتي لسه شوفتي حاجة "...
الاطفال نعمة و رزق و مهما تعبنا معاهم فا هما احلى حاجه ف الحياه..☝

- و اخيراً القاعدة الذهبية " عندك كلمة حلوة كترً خيرك"...
ما عندكيش اللسان مكانه جوه البق و متشكرين