بداية مشوار تأسيس الحب

[Rena Jesus]

في جملة بتقول
True Love Isn’t Something You Find, It’s Something You Build
بمعني ( الحب الصح مش حاجة بنلاقيها , أنما حاجة بتتبني ) ....

في وجهة نظر بتقول اننا في رحلة بحثنا عن شريك , بنكون بندور علي الحب ...
إعتقادا أن الحب حاجة بعيدة عننا و مهمتنا المستمرة اننا نفضل ندور عليها في شخص الشريك ده ..
و ساعة لما نوصل للشريك المناسب بالنسبة لنا يبقي خلاص كدة , لاقينا الحب و اتقفلت القصة , ديه النهاية ! ..
و تطلع جمل زي ( اخيرا لاقيت حبي معاكي ) , ( خلاص مش حدور علي حب تاني بعدك )
و حاجات من النوع ده .. و هنا الأزمة الحقيقية ..

الموضوع عامل - مع فارق التشبية طبعا - زي حد عاوز يعمل أكله معينة ,
فنزل يجيب المقادير و فضل يدور و يدور و اخيرا لقي أحسن مقادير ممكن يجيبها .. اشتراها و رجع بيها البيت ..
فمهما كانت المقادير هي افضل حاجة في السوق , في الحقيقة ملهاش اي قيمة فعلية بالنسبة للشخص لو مشتغلش عليها و صمم انه يعملها أحسن أكله !!
فحتي بعد ما وصلت للمقادير , لسه فيه مجهود لازم يتبذل ,, مينفعش تجيبها و يبقي خلاص كدة دورك انتهي ..!

و نظرا اننا مش بنحب مقادير أنما اشخاص بتفهم و بتتفاعل ,
فالموضوع بيكون عاوز تعب و تفاني من الطرفين عشان يبنوا بصدق الحب اللي بينهم ..
عشان يتطبعوا علي بعض و يبنوا مساحات تواصل حقيقية ..
عشان يصارعوا اي اختلاف بسيط فيهم و يحولوا مشاعر الحب ديه لحياة ممتعة و جميلة جوا كل واحد فيهم ,,

فالكاتب Tom Robbins كان بيقول
We waste time looking for the perfect lover, instead of creating the perfect love.
بمعني ( أحنا بنضيع وقت كبير في التدوير علي الحبيب المثالي بدل خلق الحب المثالي ) !!

ففي النهاية الهدف مش أنك تلاقيها او انتي تلاقيه و خلاص شكرا علي كدة ! ..
انما حتي بعد ما تلاقوا فرسان أحلامكوا أو بنات خيالكوا ,
فيه شغل كبير اوي لازم يتعمل عشان يتبلور الحب ده و يكبر بجد ..
فالعبرة عمرها ما كانت باغلي او احسن مقادير في السوق , أنما في طريقة طبخ و تنسيق الأكله نفسها ..
و الوقت اللي بتقرر أن هو ده الشخص المطلوب , مش بتكون ديه أبدا النهاية , أنما مجرد البداية ...
بداية مشوار تأسيس الحب ..

موضوع ل كيرلس بهجت