اختيار شريك الحياه

[Rena Jesus]

اختيار شريك الحياه :
القبول اضمن من الحب .. القبول يخليكي تشوفي عيوبه وتقيميه، لكن الحب يخليكي عاميه او حوله ،

- القبول يعني نقابله ٣ مرات( حتي ولو معجبناش اول مره ) بشرط نتأكد ان ترمومتر الإقتناع والإعجاب في تصاعد مش العكس ( ومش شرط يجيب يوستفندي ف كل زياره ) .

- مطلوب تكافؤ اجتماعي وعلمي وثقافي وياريت يكون الراجل اعلي ، مش مهم تكافؤ السن والفلوس ويفضل الراجل يكون اعلي واكبر ( بحد اقصي 50 دولار و 50 سنه ) .

- ضروري يكون بيكملك مش بيشبهك ، بس ياريت ميبقاش مختلف تماماً عنك ، يعني تكونوا من نفس القناعات ونفس الفصيله ( ثدييات او زواحف علشان تنقرضو مع بعض ) .

- المواصفات الشكليه مهمه للحصول علي الرضا مع ملاحظه انها هتفقد قيمتها بعد الجواز وهايتبقي جمال الصفات الروح ( يا واخد القرد علي ماله يموت القرد وتورثي عادي جدا ) .

- مينفعش يقولك هانبتدي م الصفر بعد الدراسه اوالجيش ( خدوهم فقراء تشحتوا معاهم ) ، لازم يكون فوق الصفر ،يعني علي الأقل شقه او وظيفه، الا اذا كان ( مميز جدا) متفوق دراسيا ونبغه وطموح او من عيله كبيره وغنيه وهايساعدوه وبرضو مجتهد وطموح .

- مهم تكوني بتحترميه وتحسي معاه بالأمان مش بتخافي منه او بستهيفه.

- الشاب الدنجوان زي البنت اللعوب ينفعوا للحب مش للجواز ومتقوليش هاعرف اغيره ( ده مبرر وهمي علشان تاكلي البطيخه الفاسده ).

- كبير أخواته يتجوز صغيره أخواتها .،هو محتاج دلع وانتي محتاجه راجل يحكمك ( ويكسر رقبتك ياسايبه ) .

- انتي بتشتغلي وعندك طموح علمي ، بس الباشا عايز ست بيت ، من حقه طبعا ، بس انتي ما تنفعيهوش ياماما ، علشان كده لازم نحط كل النقط علي كل الحروف قبل ما نطلع سوا ع الروف . .

- الراجل الجد بيطلب مقابله بابا، والراجل المضروب بيطلب شاي وشيشه ( يعني حب كافيات ) .

- العنوسه انك تختاري غلط وتعيشي تعيسه او تاخدي لقب مطلقه . خليكي ف بيت بابا واستمتعي بحريتك واحلامك حتي لو كملتي عمرك كده ، او قابلتي حلمك ف آخر يوم ف عمرك وعيشتي معاه ساعه واحده وتوكلتي علي الله في داهيه( ايه النكد ده ع المسا ) ، والله هاتبقي ميته سعيده احسن ما تعيشي تعيسه طول عمركً مع ............


موضوع لأيهاب معوض