ترتيب وتنظـيم جهـاز العروسة

Marina Greiss · رقم المشاركة : ( 1 ) 02 - 08 - 2013, 10:12 AM

ترتيب الجهاز فى البيت

ازاى ننظمه ونخزنه ونرتبه علشان يبقى سهل علينا يوم ماربنا يكرمنا وننقله لعش الزوجيه على خير باذن الله

طيب ليه نرتبه ما نحطه اى حاجه ووقت مااجى اودى حاجتى ابقى افرزه وارتبه

هقولك لاء

واحده تعمل زيك كده وتحتاس اخر حاجه وتبقى حاجتها منطوره فى كل حته وبيتها هايكون فيه اعصاااااااااااااار يشقلب الدنيا كلها وتنسى حاجات وتلاقى حاجات زياده وحاجت ناقصه وهيصه

احنا نتفادى كله ده وننظم من الاول

هتقولولى واللى جابت وشالت ومش هينفع طبعا ننزل الحاجه ونرتبها مناول وجديد الواحد ما بيصدق يلاقى 5سم يحط فيهم حاجه

ياستى متقلقيش ليها حل حلو بردو

نبدأ باللى لسه هتجيب او جابت حاجت مش كتير

اولا هنحتاج لشنط بلاستيك او مشمع اللى بتتباع فى كل مكان دى

وهنحتاج كراتين من عند اى سوبر ماركت او صيدليه هتلاقى عندهم كتير وصى باباكى او اخوكى يجبلك من عندهم شويه كده كل فتره

قولنا هتجيبى شنط مشمع متوسطه الحجم

بحوالى 5او6جنيه

الشنطه الاول

هتحطى فيها الانجيرى والملابس الداخليه

وقولنا هنشيلهم من غير اكياس ونعطرهم كويس

الشنطه التانيه

هتحطى فيها لبس البيت الصيفى ونشيله بردو بنفس الطريقه

وتطبيقهم زى المحلات

وهتحطى كمان الشباشب الصيفى بتاعت البيت

وهتحطى كمان لبس الخروج الصيفى تمام كده

بس مش هتحطى الشوزات الصيفى

ليه علشان مش يطبقو ويتكسرو او لو فيهم استراسات ممكن تتفك مع شيل الشنطه وتحريكها

طيب هنحط الشوزات فين هتجيبى كرتونه شكلها شيك

وتحطيهم فيها اللى حاجات اللى بعلب هتسبسهم زى ماهما

لو شوزات مش فى علب

هتحطيهم جوا الشنط بتاعت الخروج

وتحطى الشنط كلها باشوزات سواء صيفى او شتوى فى شنطه لوحدهم او فى كرتونه تانيه كبيره

وكل شنطه تحطيها فى الكيس بتاع المحل اللى جايه فيه

الشنطه التالته

هتكون للبس الشتوى للبيت والخروج واللكاليك

والكوفيات الكلام ده

طيب ليه هنحط كل حاجه فى شنطه علشان انتى لسه متعرفيش انتى هتتجوزى فى الصيف ولا الشتا لو فى الصيف يبقى قدامك شنطه الصيفى هتفضها كلها فى الدولاب وشنطه الشتوى زى ماهى هتشليها

والعكس لو هتتجوزى فى الشتا هتشيلى شنطه الصيفى لكن اللانجيرى والملابس الداخليه هتستخدميهم طول السنه

والشنط بردو هتستخدميهم طول السنه

الشوزات مضطره تطلعيهم علشان يفضلو مفرودين ويحافظو على شكلهم

ده شكل الشنك اللى بقولكم عليها

نتكلم بقى دلوقتى عن المفروشات

البطاطين واللحفه مش محتاجين يتحطو مع بعض لانهم كبار

باينين يعنى مستحيل تنسيهم لكن بردو من الافضل انك تشليهم مع بعض فى مكان واحد

وليكن تحت السرير او فى اى مكان عندك بس يكونو مع بعض

اطقم السرير بقى والفوط

نفس الشنط بتاعت الهدوم بردو

بس هتجيبى مقاس كبير

وكل طقم تجبيه تحطيه فى الشنطه دى سواء

طيب فى حاجات مش هينفع تتحط فى الشنطه دى زى مثلا مفرش السرير الصيفى والشتوى الكوفيرتات الفايبر

لانه حجمهم كبير

يبقى هتشليهم مع ركن البطاطين

وان شاء الله لما تيجى تنقليهم تربطى حاجتين مع بعض

يعنى كل كوفيرتياتين تربطيهم مع بعض

علشان اللى يشيل مايتلخمش ويعرف يشيل مثلا بطانيه واحده واتنين كوفيرته اللى ربطناهم فى بعض

تمام كده

ندخل بقى على حاجات المطبخ

طبعا طقم الصينى او الاكوبال او طقم العشا الكبير كلهم كرتونات كبيره اوى مينفعش نحطهم مع حاجه تانيه ومعروفين مش كتير يعنى مش هننسى حاجه فيهم ان شاء الله

بس بردو حاولى تخليلهم ركن مع بعض لو قدرتى

طيب بالنسبه للكوبايات والكاسات والحاجات القابله للكسر دى هنعمل فيهم ايه خاصه انهم غالبا احجامهم صغيره

هنجيب الكراتين

ونقفلها من تحت بالسلوتيب

ونرص الاطقم دى مع بعض فى الكراتين وكل ما تخلصى واحده اقفليها بالسلوتيب العريض كويس والزقى عليها ورقه كبيره واكتبى عليها قابل للكسر وارسمى كاس عليها او جمجمه وعضمتين

ايوه بجد مش بهزر علشان اللى يشيل الحاجات دى يبقى عارف انها ممكن تتكسر يشيلها بحرص ويحطها بحرص

ونفس الموضوه للرافايع بتاعت المطبخ هتحطيها فى كراتين

وحطى عليهم كود

واكتبى فى الكشكول بتاعك الكود وتحته الحاجات اللى موجوده فى الكرتونه

علشان لما حاجتك تروح شقتك باذن الله تبقى عارفه كل حاجه هتروح فين

علشان اللى هيطلعهم هيحط اى حاجه مش زى ما انتى مرتباهم

تقومى انتى جايبه الكراسه بتاعتك وتفتحى وتوزعى الكراتين براحتك بقى مثلا كود

k101,102,103

مكانهم

المطبخ يبقى على المطبخ يتفتحو هناك

وتقسمى بقى رفايع المطبخ لوحدها فى كراتين

ورفايع الحمام لوحدها

وكاسات وكوبايات المطبخ لوحدهم كاسات وتحف النيش لوحدهم

يتبــــــــــــــع

Marina Greiss · 02 - 08 - 2013, 10:17 AM

نيجى بقى لحجاتك انتى اللى هى

ميك اب اكسسورات ادوات العنايه بالبشره والشعر البرفانات

دول بقى هتجيبى البوكسات بتاعت الهدايا لو عندك خير وبركه لو مش عندك حاولى تشتريهم بجد ينفعو جدا دلوقتى وان شاء الله بعد الجواز

هتخصصى بردو كول بوكس لحاجه بوكس للميكب وبوكس للاكسسورات

طيب الشاور والشامبو والوشانات مش هتكفى فى البوكس ده هنعمل ايه ممكن نجيب اتنين باسكت خوص اوبامبو وتحطى فيهم

حاجتك وحاجه خطيبك وتلفى الباسكت ده بالتل وتعملى فيانكو بالشرايط الساتان من فوق

فى صوركتير لتزيين الجهاز بس حاسه انها مكلفه اوى لانهم مزينين كل حاجه لكن احنا هنزين الحاجات الخاصه بس

يعنى لو جيبتى متر تل ب10 جنيه وبكره ستان مش عرضه اوى بحوال 3جنيه وممكن تشترى بالمتر كمان مش هيكلفك 15 جنيه كله على بعض ومش هترميهم بعد كده هتستخدميهم فى حاجات كتير بعد كده فى تزين تسريحتك او حمامك

حاجات بسيطه زى كده

ونلفت البوكسات بردو زيها

واكيد هيتبقى مننا شرايط ستان على ايد الشنط اعملى فيانكو بسيط
مش لازم كتير زى الصوره

طيب بالنسبه للى اشترى من فتره وشالت الحاجات خلاص ومش هينفع تطلعهم وتعمل النظام ده مش مشكله بردو هقولك على طيبقه تعرفى بيها تنظمى حاجتك بسرعه يوم ما تطلعيهم علشان يروحو بيتك ان شاء الله بس المهم اللى لسه مش اشترتيه نظميه من الاول

هاتجيبى كراستك رفيقه الدرب دى

وتروحى على الاماكن اللى شاليه فيها حاجتك

وتطلعيهم يتهوو يعنى لو تحت السرير هتقلبى المراتب وتفتحى الشباك الصبح بدرى علشان ياخدو وقتهم وتكون الدنيا لسه مش تربت اوى ويشمو الشمس

وتكتب مثلا الحاجات اللى تحت سريرك فى مثلا بطانيه ومفرشين ولحاف وطقم فوط وطقمين كاسات وطقم اروكوبال مثلا

وتكونى مقسمه فى الكراسه يعنى صفحه للمفروشات

وصفحه لحاجات المطبخ

وصفحه ....... وهكذا

وكل ماتلاقى حاجه فى مكان تكتبيها فى مكانها

يعنى لقيتى لحاف اكتبى فى صفحا المفروشات

لحاف وتكتبى مواصفاته وتكتبى مكانه

يعنى لحاف روز فى ابيض فايبر تحت سريرى

بطانيه بيج فى بنى وزن 8ك تحت سرير اختى