كيف تحضر الماء لأنتاج اسماك الديسكس

[Mary Naeem]

كيف تحضر الماء لأنتاج اسماك الديسكس






اخواني مربي الاسماك وبالاخص اسماك الديسكس...راح اكتبلكم هذا الموضوع عن الماء اللازم لانتاج الديسكس لان انتاج الديسكس صعب لكل مبتدء وحتى اصحاب الخبرة ومكلف جدا لكل شخص يريد ان ينتج اسماك الديسكس بسبب ان الماء المستخدم للانتاج صعب التوفير لكن اني عندي الحل لهذه المشكلة وغير مكلفة وانما ببلاش تقريبا...وبالاحرى هبة من رب العالمين وكل المربيين يكدرون يستعملون الماء هذا...طبعا اتسرعت بكتابة هذا الموضوع اشوية لغرض فصل الشتاء والاستفادة منه....كيف تحضر الماء لأنتاج اسماك الديسكس....




اني عن نفسي استعملته ونجحت عندي....اولا وبالمختصر اسماك الديسكس تحتاج ماء بمعدل حموضة وقاعدية الماء والاملاح وايضا الحديد والى اخره..للحصول على هذا الماء للانتاج تحتاج فلتر فيه 4 الى 5 فلاتر وايضا (يو في) للتخلص من البكتريا الموجودة في الماء اللي نستعمله....لكن رب العالمين اكرمنا بماء صافي وخالي من كل الشوائب ونقي ويفيد لتربية اسماك الديسكس وايضا انتاجه وتكاثره وهو ماء المطر ونحن مقبلون على فصل الشتاء والامطار راح اتزيد فيه احسن فرصة هي جمع ماء المطر...



واحد يسأل ويكول اشلون اخلي طشت واشكد اجمع؟؟؟راح اكولك لا حبيبي عندك السطح ويجمعلك اكثر من حاجتك استخدام بوري تصريف مياه السطح تاخذ منه صونده واتخليه ابتانكي او جليكان وتكدر تاخذ على كد كد كيفك وتكدر تحتفظ بيه ايضا....واكوا طريقة بعض البواري بيها قطعة وصل من الوسط تكدر تفتحه واتركب الصونده وادخله لاي تانكي قريب على البوري او اتمد الصونده للتانكي وراح يكون عندك ماء نقي وخالي من كل الاشياء اللي مكتوبة بالتقارير العلمية عن توفير الماء المناسب....



واحد يسأل يكول زين هذا ابفصل الشتاء والصيف اشلون من وين اجيب مطر والتانكي راح يكفيني لو لا؟؟؟؟؟اكولك واجاوبك حبيبي بالصيف اسهل من الشتاء يجيك نفس الماء وبنفس المواصفات هسه اغلب الناس صايرة تستعمل ماء السبلت الي هيه المكيفة الهوائية الموجودة باغلب البيوت ينتج منه ماء من صوندة ممدودة الى برة البيت او للحديقة واحنا ناسيين بأن هذا الماء الناتج هو اصلا افضل من الامطار وابلاش اثنينهم نعمة من رب العالمين ويكون الماء الناتج من السبلت ماء نقي ويفيد الاسماك بشكل جدا جدا وللانتاج جدا مفيد وماينقطع لان هم اتبرد نفسك وهم تستعمل الماء الجاي منه للاسماك واذا اتريد اتبدل نسبة من ماء الحوض عادي متحتاج فلاتر و uv والى اخره من اللي مكتوب..




شخص يسأل اخي الحوض مالتي ابعاده اهوايه وياخذ 500 لتر والسبلت ماينتج كفايه؟؟؟صح الكلام كلت الشتاء جاي والشتاء يوفر اكثر انت تمليه للحوض بفصل الشتاء والصيف تكدر اتغير منه من تحتاج اضافة نسب معينة...واني استعجلت بالموضوع لغرض فصل الشتاء..والموضوع الاساسي للانتاج فالانتاج يكون بحوض قياساته صغيره مثلا 70x70x80 مثلا هذا للانتاج فالسبلت يطلعلك باليوم حوالي 2 لترين ماء باليوم واذا الجو بيه رطوبة واصلا جو العراق بيه نسبة اهواية من الرطوبة فهذا ينتج عندك ماء اكثر ويزيد وتكدر تنطيه لاصدقائك...




هذا راح يكون الجزء الاول من التقرير لان الاخ على النجار طلب مني اكتب تقرير فراح اسويه اجزاء واكتبلكم الباقي بالجزء الثاني وايضا راح اشرحلكم بالصور عن طريقة تحويل الحوض النهري الى بحري وبتكاليف جدا جدا قليلة وتكدر اتربي اسماك بحرية بيه طبعا لكن كما ذكرت مرة بأن الغاية الاساسية بتحويل الحوض النهري الى بحري هي الفلترة وطريقة انتاج البكتريا الجيدة وايضا بقاء الماء دون التعكر واضافةً الى عدم تغير الماء كل فترة وفترة لكن هذا يحتاج صور فاذا كملت الصور راح ارفعه ومعاه صور توضيحية...
اتمنى تستفيدون من الفكرة خاصةًًً الي يريد ان ينتج اسماك الديسكس..وكل شيء طلع بالنهاية ببلاش دون صرف فلس على الاسماك وان شاء الله راح تنتج عدكم هذه الاسماك...
تحياتي للجميع
أخوكم أبو رووان

[Mary Naeem]

تحضير الماء لتربية اسماك الديسكس


اخوان مشاكل الديسكس كلها من الماء الموجود او المستعمل بالجزء الاول كان للانتاج لكن الجزء الثاني للتربية.
اولا نوع الماء: يفضل من ماء التانكي ومهما كان قديم يكون احسن اكثر بعد ما اتركب الحوض وبكل مستلزماته وتملأ الحوض بالماء اهم شيء اتضيفه هو (الانتي كلور ) هذا ضروري جدا لازم اتضيف الانتي كلور للحوض واذا ماعندك انتي كلور تكدر اتشغل الماطور 2 الى 3 ساعات باليوم واتخلي الهيتر اذا كنت بفصل الشتاء واتبقى الماء 3 ايام بدون اسماك وكل يوم 2 او 3 ساعات اتشغل الماطور هذا اذا ماخليت انتي كلور و اكو نوعين بالسوك انتي كلور صلب وسائل وطبعا السائل افضل لان الصلب يكون اصعب وهو مو غالي بالسوك لكن السائل يكون اسرع يعني من تملي الحوض ماء اتضيف الانتي كلور للحوض واتشغل الماطور ساعتين وبعدها يكون الماء جاهز لاضافة الاسماك.




سؤال-اضيف ملح للحوض؟ الجواب هو أخوان معظم محافظات العراق بيها نسبة ملح بالماء وراح اشرح كل المناطق من البصرة ومروراً ببغداد ووصولا الى اربيل ماتحتاج اتضيف اي ملح للحوض..اما اذا كنت بمحافظة السليمانية والموصل ودهوك نعم تحتاج اتضيف ملح.
سؤال ليش هذه المحافظات دوناً عن الباقي؟ الجواب لان ماء الموصل والسليمانية ودهوك مافيه ملوحة مثل باقي المحافظات فيكفي الملح الموجود ومتحتاج ملح اما المحافظات الي ذكرتها تحتاج حسب ابعاد الحوض والنسبة المذكورة على كيس الملح.


سؤال بعد اي نوع اضيف للحوض؟ اعزائي اخذها مني ماتحتاج اي شيء غير اللي ذكرته والباقي وفر افلوسك تشتري بيهن سمك اكو يكولك هذا كريستال يسويلك الحوض زجاج وتلفزيون هذا كله ماله اي صحه الانتي كلور مفيد جدا والملح اذا كنت من المحافظات المذكورة.

الاضاءة:




الاضاءة جميلة للحوض لكن صحة وجمال السمك أجمل اني ما اشجع للاضاءة ابداً غير فترة التغذية يعني من اتغذي الاسماك تشعل الاضاءة ساعة او ساعتين حتى تلتقط الاسماك كل الاكل المتساقط داخل الحوض.
الاسماك لاتحب الاضاءة باي شكل وراح اتعلم السمك مالتك بأن من اتشغل اضاءة راح يرتفع الى اعلى الحوض ينتظر الطعام بعد فترة يعني راح اتخليه يتعلم بأن اضاءة يعني تغذية.

[Mary Naeem]

طريقة تغذية الاسماك.

احسن وافضل اكل وفيه بروتينات ويكبر السمك مالتك بخلال فترة قصيرة طبعا يعتمد على كبر الحوض ايضا لكن افضل شيء هو الدود المجمد اكو دود مجمد عند الباعة اصحاب المحلات ويكون على شكل مكعبات وفي الاعلى يكون احمر لان اكو اصفر وازرق واحمر الاصفر والازرك هذه روبيان هذا لا اتقربه للاسماك ليش لان يوسخ الحوض مالك بيوم واحد والديسكس مايحبه اهواية واسمعه مني واذا كنت غلطان عاتبني...اما الاكل المجفف والرقائق والشركة الفلانية لتصنيع الاسماك...كلت بالبداية وفر فلوسك للاهم لاني اشرحلك باقل كلفة وجودة وصحة للاسماك وايضا الدود المجمد كلش يفيد بالتزاوج لانه يحتوي على بروتينات واكل متكامل.
وهذه صور الدود المجمد...الصنع ايراني والمتوفر بالسوك واسمه دود الدم او Bloodworms

وهذا الصنع الاجنبي وقليل التوفر يعني ما اتلكيه بسهولة وهذه الصورة الامامية

وهذه صورته من الخلف والمكعبات الموجودة

[Mary Naeem]

طريقة التغذية المناسبة للأسماك
باليوم الواحد مرتين مرة الصبح ومرة العصر او بالليل من تفتح مكعب من الدود المجمد اغسله بالماء قبل ما تنطيه للاسماك لان اكو بعض من الماء المجمد فاغسله واذا ما يعجبك تلمسه لانه دود اكو منكاش او ملقط تكدر تاخذ المكعب واتخليه تحت ماء الحنفية وبعدين خليه بالحوض مو بوسط الحوض لا...وانما بالزاوية القريبة عليك وخليه يتساقط بنفس الزاوية وطفي الماطور قبل ما اتغذيه ب 5 دقائق حتى تتوقف حركة الماء والاكل يسقط بمكان واحد حتى لا يتوسخ الحوض ويترسب الدود بمكانات ما توصله الاسماك.



افضل الزاوية الي اتخلي فيها الاكل يكون القعر رمل. الرمل الناعم موجود عند اصحاب المحلات من اتنصب الحوض اختار الزاوية الي راح تستخدمه للاكل وخلي هذا الرمل واكو رمل بحري اذا كان رمل بحري اغسله زين قبل ما اتخليه بالحوض اما اذا كان اكو رمل نهري هم غسله بس مو بدرجة الرمل البحري.


سؤال ليش رمل ليش مو احجار؟ الجواب اخي راح يترسب الدود بالقعر لان السمك ما راح يلتقط كل الاكل فاذا كان القعر رمل راح يوكع على الرمل وبعد فترة راح يروحله السمك وياكله حتى اخلصك من تعب تبديل الماء وتنظيف الحوض..
اني هذا كله امسويه لغاية هي عدم تنظيف الحوض كل فترة.

اخوان اكو انواع اهواية من اكل السمك وهذه الصورة توضح ذلك



هذا كله ما يفيدك وخلي افلوسك لاشياء تنفعك
ملاحظه اذا اشتريت دود مجمد شوف تاريخ الانتهاء والتصنيع لان بيه تاريخ انتاج انتبه الى هذه النقطة.

[Mary Naeem]

النباتات المفضلة للحوض.
هاي صورة لبعض النباتات الي اتفيد اتكون داخل الحوض واشرت عليه هذه النباتات ما اتخيس بسرعة واذا اتلاحظ امخلينه ابسندانه وتكدر اتخليها هي والسندانه داخل الحوض واذا تلاحظ الرمل اللي في قعر الحوض اللي اتكلمت عنه بانه افضل شيء حتى يبقى الطعام المتبقي فوق الرمل والاسماك تقدر تلتقط الطعام المتبقي دون ان يتعفن وتطلع ريحه من الحوض وتحتاج تبديل وتغير الماء.

طرق تمييز الذكر عن الانثى..صعبة جدا تكدر اتميز بين الذكر والانثى اكو بعض الخبراء يكدرون اني مو خبير لكن هاوي وصاحب تجربة واللي كتبته كله عن تجارب ولا تتوقع ما مات عندي اسماك ديسكس بالعكس مات عندي اهوايه لكن بالاخير عرفت اشلون اربيه وبهذه الطريقة فقط ماخليت اي نوع من الادوية اي كله مواد كيمياويه يعني اتضر اكثر من تنفع...واحد يسأل يكول لعد قابل الشركة سوته هيج؟
لا حبيبي الشركة صنعته صحيح لكن لكل منطقه جغرافية سيأتها وحسناتها ولكل ماء قواعده الخاصة هي احتمال تنفع بس مو للماء مالتنه بالنسبة الي ضرتني ما نفعتني واني اكتب اللي اني جربته لان مثل ماكلت اني مو خبير اني مجرد هاوي واكتب عن خبرتي فقط.
وراح اكتب النسب بالمرة القادمة او تكدر اتراجع المنتدى لتربية اسماكالديسكس فيه مواضيع اتفصل اكثر وعن النسب ايضا والطريقة اللي تعرف بيها المقاسات اني اطلعت عليها وايضا بيها معلومات جدا مفيدة راح اتزيد من خبرتك.