الدعم مش إنك تشيل الألم

[walaa farouk]

أوقات كتير بنفتكر إن اللي محتاج عزاء محتاج إجابة،
أو اللي موجوع لازم نطلّع له حلّ،
فنقول جُمل محفوظة زي:
“هتعدي” أو “قوّي قلبك”.
بس الحقيقة؟
في ناس مش عايزة وعظ ..
هي بس عايزة حد يحسّ بيها.

في لحظات الألم،
اللي بنحتاجه مش بُطولات كلام،
لكن طبطبه في الجُملة:
“أنا فاهمك.”
“أيوه ده صعب.”
“أنا جنبك.”

لما حد بيحكي عن وجعه،
مش دايمًا مستني نصيحة،
هو بس محتاج يِسمح لنفسه يعيش الإحساس
من غير ما حد يقول له: “عدّي بقى” أو “كبّر دماغك”.

الناس مش دايمًا بتدور على حل،
أوقات كتير بتدور على إذن إنها تحزن.
عاوزة اللي يقول لهم:
“مشاعرك من حقك.”
“اللي انت فيه مش مبالغ فيه.”
“وانا مش هسيبك تعدّي ده لوحدك.”

الدعم مش إنك تشيل الألم،
الدعم إنك تبقى موجود جواه.