أنا المفلوج

[walaa farouk]

ماكانش حد يعرفنى ..
ولا حد جايب خبرى ..
قاعد باتفرج مستنى ..
ومسلِّم للناس قدرى ..

اصل انا حد مالوش حد ..
عشان ياخد بايده ويرميه ..
وانتظارى لحد فاق الحد ..
38 سنة وانا مستنيه ..

وفجأة من غير مقدمات ..
لقيت قدامى المسيح ..
وسؤال رجع لى ذكريات ..
عايز ترجع تانى صحيح ؟؟..

رديت بغشامة قلبى ..
ماليش اللى ياخد بايدى ..
وكل ما اقول خلاص هانزل ..
يسبقنى واحد غيرى ..

ولسة هاكمل كلامى ..
قاطعنى وقال لى امشى ..
لسة هاقول له طب ازاى ..
قاللى تشيل سريرك كمان ..

وكأن الأمر لعظامى ..
ولأعصاب ماتت من زمان ..
مش بس بأمره شفانى ..
ده بكلمة منح غفران ..

وكأن السنين اللى عدت ..
قدامه بقت لحظات ..
والايد اللى للناس اتمدت ..
اترفعت بالتهليلات ..

مشيت وانا باتنطط ..
وباودع سنين الندامة ..
وباحكى عن حنيته لما قاللى ..
حمدالله ع السلامة ..


أنا المفلوج