حامل في كنز

[walaa farouk]

حصل فعلا من سنين ..
بس من جمالها .. هاحكيهالكم تانى ..

"طبطبى على بطنك"
الكلمة الوحيدة اللى جات على بالى اقولها لها

ماكنتش عارف اقول لها ايه وهى بتكلمنى منهارة ..
عندها اكتئاب حمل .. ومش حاسة بالفرحة خالص
وكلها ايام وتولد ..
بقيت اقول فى سرى ..
انتى مش داريانة بنعمة ربنا ان يبقى جواكى طفل ..
دانا اللى اسمى راجل، نفسى احس الاحساس ده ..
مالقيتش كلام اقوله لها
بس صعب عليا البيبى اللى جواها ..
كان نفسى اقول لها .. لو ربنا اداله لسان بينطق جواكى
كان قالك ماتخافيش انا جى عشان افرحك
ماتصدقيش كلام الناس عن المسئولية والسهر والتعب
بكرة اكبر وافرحك .. وهافضل طول عمرى مديون ليكى

كنت عايز اقول لها ..
لو كل واحد افتكر اللى حصل معاه جوا بطن امه
كان حكى احلى حكاية ممكن تتقال ..
ساعتها افتكرت حوار كنت كتبته زمان
وقررت احكيهولها ..
.
.
.
قلت لها لما قربت ابقى أب لتالت مرة ..
قعدت افكر فى المكان اللى البيبى موجود فيه دلوقتى
هو موجود فى مكان من وجهة نظرى ضيق جداً
بس بالنسبة له بحر بيعوم فيه .. مش جايب اخره
بينام براحته وبيصحى براحته
هوا نضيف .. واكل نضيف
ولا تعصـ ،ب ولا تطـ، رف ..
ولا تمييز بسبب اللون او اللغة او الدين
مافيش هم ولا مسئولية
عشان اللى بياخد باله منه دلوقتى ..
هو اللى اساساً اداله الحياة
مش انا ولا مامته ..

اللى بياخد باله منه دلوقتى وبيكلمه ..
هو الله اللى خلقنى وخلق مامته ..
واللى انعم علينا بالنعمة دى

نعمة ان احنا نفتكر .. انه بمزاجنا او باختيارنا ..
ان احنا نجيب طفل تالت
لكن هو اللى بيعطى كل واحد بحسب مشيئته وإرادته
وكلها ايام .. وياخد الإذن انه يخرج ..
وتخيلت ربنا قبل الإذن هيقول له ..
- هاسيبك تواجه الحياة .. بس هافضل واخد بالى منك
• طب وانا هاعمل ايه؟
• مين هيشيلنى؟ .. ومين هيأكلنى؟
• مين هيلبسنى؟ .. ومين هيدفينى فى الشتا؟
• طب مين هيهتم بنضافتى؟
• مين هيفهمنى من قبل ماتعلم اتكلم؟؟؟؟؟؟؟؟
• لالالا خلينى معاك .. مش عايز اروح للدنيا .. انت احلى من كل الدنيا
لكن ربنا هيقول له .. زى ماعلمنا
- انا هاسلم امانتك لـ راجل ومراته .. هم اللى هياخدو بالهم منك
- ولو لجأوا لى وطلبوا مساعدتى .. اكيد هاقف معاهم
- وحتى لو نسيوك فى يوم .. انا مش هنساك
- ماتخافش، انت ابنى .. قبل ماتكون ابنهم
- وماتقلقش، امك هتبقى احن عليك من اى حد فى الدنيا
- وابوك مش هيعرف ينام مرتاح لو انت تعبان
- امك هتبقى غطا ليك فى الشتا .. ونسمة حلوة فى الصيف
- وابوك مش هيعرف ياكل .. غير لو انت شبعان
- امك هتسيب دنيتها كلها وهتاخد بالها منك انت واخواتك
- وابوك هيبقى شغله الشاغل راحتكم
- ولو انت عامل كل ده عشان ماتسيبنيش
- ماتقلقش .. هم هيعلموك ازاى تكلمنى وازاى تسمع صوتى
- هيعلموك ازاى تمشى فى طريقى عشان فى الأخر توصل لى
- ياللا جهز نفسك .. قدامك ايام وتروح لأكتر ناس هتحبك فى الدنيا
- وهم على فكرة مستنيينك من زمان
- خلى بالك عندك أخ اسمه اوغسطينوس هيبقى احن اخ ممكن تشوفه فى حياتك
- واخت اسمها مجدالينا هتبقى امك الصغيرة وهتاخد بالها منك
- انا باعتك ليهم فرحة وخير
- وعقبال ماشوفكم كلكم بخير

وفجأة .. صوت وجع .. والم وصريخ
وكأنها زلزلة عظيمة .. بتعلن عظمة الخالق
وبتثبت وجود الله ..
وكل الناس فى نفس واحد ينطقوا ..
سبحان اللى بيخرج روح من روح

افرحوا بعطية ربنا ليكم
ماتركزوش قوى فى مصطلحات الطب ..
اللى باعت لكم نعمة الاطفال .. هو اللى خلق الطب ..
ماتصدقوش الوهم اللى الشيطان بيحاول يزرعه
عشان يخليكم تنسوا غلاوتكم عند ربنا

خلّوا الدموع اللى تنزل بسبب ولادكم .. تبقى دموع فرح

ربنا يفرحكم

بعدها بمده
كلمتنى تانى وهى بتعيط ..

قالت لى انا لقيت نفسى بابكى ..
عشان زعلت بنتى اللى فى بطنى بمضايقتى ..

وبعد شهر .. بعتت قالت لى
انا ولدت من 3 ايام بنوتة قمر ..
واكتشفت انى بحبها جدا ..

ضحكت فى سرى وقلت ..
قديمة .. عرفت من قبلك انك بتحبيها ..