بترتيب الأحداث نجد فى أنجيل معلمنا يوحنا الحبيب الإصحاح العاشر من عدد 30 بيورينا لما السيد المسيح قال أنا والآب واحد فأمسك اليهود حجارة وأرادوا يرجموه فقال لهم أعمال كثيرة حسنة عملتها ليكم من عند أبى فلماذا تريدون أن ترجمونى فقالوا ليست علشان الأعمال لكن علشان عملت نفسك إله فقال ليهم المسيح طيب ما مكتوب فى ناموسكم أنا قلت أنكم آلهة لمجرد أن كلمة ربنا صارت لناس وأصبحوا وكلاء على هذه الكلمة , إذا السيد المسيح لما يقول على نفسه أبن الله فمفيش عجب فإذا كان بيتقال عنكم أنتم بنى العلى , لايمكن أن ينقض المكتوب يعنى اللى أنكتب مش ممكن يتلغى فكلمة ربنا مش ممكن تتشال فإذا كان اللى وصلت ليهم الكلمة دعاهم آلهة فكيف هو حال الكلمة ذاتها أتستكترون عليا أن أنا أقول أن أنا أبن الله وأن أنا إله , طيب أنتم وصلت ليكم الكلمة لكن أنا الكلمة ذاتها , الحقيقة هم ما قدروش يحكموا بالحق ولم يكونوا أمناء ولم يكن فيهم من القداسة شيئا , فالذى قدسه الله وأرسله إلى العالم وكلمة قدسه يعنى كرسه أو خصصه فلما نقول أن الهيكل مقدس يعنى الهيكل ده مخصص ومكرس وهو الكلمة اليونانية اللى بنسمعها أفئير آجيا دى نينموس أو كلمة آجيوس التى تعنى قدوس , مقدس مخصص مفرز , وكلمة أرسله تعنى أن الأبن هو اللى مرسل إلى العالم لأنه مخصص لفداء العالم وهو ده سر اللاهوت كله ,وكما رأينا أن هذا الحوار الذى تم بينه وبين اليهود كان على مستوى الفكر فالسيد المسيح بيكلمهم وبيرد على إدعائهم ,لكن السيد المسيح أنتقل من الإقناع الفكرى إلى الإقناع العملى وقال أن كنت لست أعمل أعمال أبى فلا تؤمنوا بى , فمش فقط الكلام اللى أنا بأقوله بيثبت أن أنا أبن الله لكن كمان الأعمال اللى أنا بأعملها , صدقوا فيا وتؤمنوا بيا , والحقيقة بالنسبة للإيمان بشخص السيد المسيح بيكون نتيجة حاجة من أتنين : 1- إما الإنسان يصدق كلام الله 2- أو إما الأنسان يصدق أعمال الله أو معجزات الله , فبالنسبة للتلاميذ والناس اللى عاشت فى ألفة مع السيد المسيح كان مصدر إيمانهم الكلام اللى بيقوله المسيح نفسه , لكن بالنسبة لليهود عامة اللى مالهومش شركة وعلاقة مع السيد المسيح , كان السيد المسيح بيدعوهم للإيمان من خلال الأعمال أو المعجزات اللى كان بيعملها , وعلشان كده الإيمان بالنسبة للإنسان المؤمن يزيد بكلام الله , لكن الإيمان بالنسب’ للإنسان البعيد الغير مؤمن فهو محتاج إلى معجزة أو عمل شىء يبهره وما يقتنعش بكلام وفى واقع الأمر هو مفيش تعارض بين الكلمة والعمل والمعجزة , وعلشان كده كل ما إيماننا يضعف فنجرى نبحث عن معجزة وعايزين معجزة , ولكن لو إيماننا قوى فمجرد أن أحنا نسمع كلمة ربنا فنآمن بيها , يعنى مفيش فرق بين الكلمة والمعجزة لأن المعجزة او الآية عبارة عن كلمة مفعولة أو معمولة ولذلك كلمة المسيح هى عمل (كن فكان) , والعجيب أن هذا هو الصراع اللى فضل دائما ما بين اليهود وما بين المسيح , وهنا اليهود بيقولوا له قول لينا كلمة بعد ما عمل معجزة تفتيح عينين المولود أعمى , يعنى المسيح عمل عمل فيقولوا ليه لأ أحنا عايزين كلمة , وفى مرة تانية لما كان بيتكلم أن هو الخبز الحى النازل من السماء وعمال يتكلم بالكلام ده فقالوا ليه أى آية ترينا !؟ يعنى لما يكلمهم يقولوا ليه عايزين معجزة أو لما يعمل معجزة يقولوا ليه عايزين كلمة , الإنسان مش عارف هو عايز أيه؟ وعلشان حين تصرخ أعماله عاليا بقوة وبجهارة يطلبون منه قولا وحين يعلم بالكلمة يطلبون منه معجزة أو عملا , وفى وحدانية مطلقة وفى تداخل أو هم الأثنبن فى بعض قال أنا فى الآب والآب فيا , فيتبقى لينا ما ذكر فى أنجيل معلمنا يوحنا عن عدم إيمان اليهود ورد فعلهم عن كلام السيد المسيح الذى وضحته بعاليه وعن أن يوحنا لم يفعل آية أو معجزة واحدة فى يوحنا 10: 39- 42
29 - 10 - 2023, 10:54 AM
العرض العادي
