استلمت قلب

[walaa farouk]

لما بتروح شغل جديد، غالبًا بتستلم المعدات اللازمة
علشان تعمل الشغل ده.
وفي الخدمة والكلام عن يسوع، بتستلم إيه؟
شهادة تدريب إعداد خدام!.. ورقة ممضية من قسيس الكنيسة!..
تأييد مسئول الخدمة!

علشان تخدم وتكون فعَّال في المهمة اللي الله اختارك ليها،
كل الحاجات اللي قولناها فوق دي جميلة وحلوة ومطلوبة،
بس مش أساسية.
كل دي ولا حاجة لو ماستلمتش أهم حاجة
💝 قلب جديد

عارف شاول؟ اللي بنبدأ نسمع عنه في صموئيل الأول 9.
لما الله اختار شاول يكون ملك ومسئول عن شعبه وصموئيل النبي قاله على اللي هيحصل والمهمة اللي مستنياه، حصلت حاجة مهمة جدًا
"وَكَانَ عِنْدَمَا أَدَارَ كَتِفَهُ لِكَيْ يَذْهَبَ مِنْ عِنْدِ صَمُوئِيلَ أَنَّ ٱللهَ أَعْطَاهُ قَلْبًا آخَرَ" صموئيل الأول 10: 9
بمجرد ما استلم المُهمة المُكَلَف بيها، الله سلِّمه أهم أداة هيحتاجها (القلب)
بس ⚠ خلّي بالك ⚠ لأن شاول نهايته كانت عكس البداية تمامًا، لما ابتدى يبعد عن الهدف وعن قلب الله
"ذَهَبَ رُوحُ ٱلرَّبِّ مِنْ عِنْدِ شَاوُلَ" صموئيل الأول 16: 14
والله يبعت صموئيل لشاول يقوله عن داود:
"وَأَمَّا ٱلْآنَ فَمَمْلَكَتُكَ لَا تَقُومُ. قَدِ ٱنْتَخَبَ ٱلرَّبُّ لِنَفْسِهِ رَجُلًا حَسَبَ قَلْبِهِ" صموئيل الأول 13: 14

الله عمره ما شاف العلاقة معاه ولا خدمته مرتبطين بأي حاجة تاني
.. غير القلب.
💚 قلب متوصل بقلب الله علشان يتنقى ويتقدس يوميًا
قدامه ويفهم مشيئته.
💚 قلب يحس بالمخدومين والرعية ومشاكلهم.
💚 قلب متفاعل مع احتياجات الناس اللي حواليه.
💚 قلب جاهز يتحرك للأماكن المحتاجة مش الأماكن المنورة.
💚 قلب بيطلب مجد الله دايمًا مش مجد نفسه.

استلمت قلب؟

الخدمة