بنتك بتخاف من الأغراب
الاسبوع اللى فات كنت عند بابا انا واخواتي
وبنت اختي الصغيره أول ما دخلت مع ماماتها بقت تبصلنا وتعيط وخايفه
اختي بقت مستغربه وبتقول
مش عارفه هي لما بتشوف ناس غيرنا انا وباباها بتعيط ليه
هي يا حبيبتي لسه عندها شهور بسيطه ومش بتشوفنا غير كل فترة طويله
فأحنا بالنسبه لها أغراب
الخوف شيء طبيعي عند الأطفال وجزء من تطورهم العاطفى فى السن ده وممكن يفضل لغاية ما يوصلوا لسنتين من عمرهم كمان
طيب ده طبيعي
طبعا طبيعي جدا بس مش شرط يكون عند كل الأطفال لنفس السبب
يعني
ممكن يكون خوف من الأغراب أو من الصوت العالى أو من الطيور والحيوانات أو غيرها من الأسباب اللى بتختلف من طفله لطفلة
بس متنسيش انه جزء طبيعي من تطورها العاطفى فى السن ده وهيختلف مع نموها وتطورها العاطفى مع الايام
