منتدى الفرح المسيحىمنتدى الفرح المسيحى
  منتدى الفرح المسيحى
التسجيل التعليمـــات التقويم مشاركات اليوم البحث

اسبوع الالام
 أسبوع الآلام 

لك القوة والمجد والبركة والعزة إلى الأبد آمين

ثوك تى تى جوم نيم بى أوؤو نيم بى إزمو نيم بى آما هى شا إينيه آمين


العودة  

إضافة رد
 
أدوات الموضوع انواع عرض الموضوع
  #1  
قديم 21 - 05 - 2021, 04:48 AM
الصورة الرمزية walaa farouk
walaa farouk walaa farouk غير متواجد حالياً
..::| الإدارة العامة |::..
 
تاريخ التسجيل: Jun 2015
الدولة: مصر
المشاركات: 376,493

استمتعوا بالتعب الجميل



تقول أحد الأمهات :
لما كانوا ولادي صغيرين كنت بصحى خمسة ونص الصبح اصحى إبنى الكبير 👨 يدخل الحمام ويفطر كويس ويلبس وينزل المدرسة الساعة ستة ونص لأن المدرسة كانت بعيدة .

بعدها اصحى الوسطانى 👦 في الحضانه ونعيد الكورس وينزل سبعة و نص .

وبعدين أحضر فطار جوزي 🍳☕ و يصحى الصغير 👶 يفطر
واخده وأنزل أشتري الجرايد لأنى من عشاق السياسة ... لما نرجع ألاعبه و أطبخ الغدا 🍝

يبتدوا الكبار ييجوا يتغدوا 🍢🍡 و يحلوا الواجب ولو ورانا تمارين ألبس التلاتة وأنزل بيهم .

لما نرجع من التمرين كله ينام ٨ مساء ... طبعا حاتفتكروا إنى كنت بادخل أنام 😊 لا طبعا ☺

أولا : جوزي كان بييجي من ١٠-١١ مستني ياكل

ثانيا : حد يضيع ساعتين من الصمت التام ... كنت أعمل شاي وأجيب حاجة ساقعة والأكل لانى غالبا نسيت آكل وأقعد أبص في الصمت المحيط بى ... كنت بتمنى يكبروا و أرتاح وأنام عشر ساعات بدل خمسة !

وكبروا وطول النهار قاعدة لوحدي .
وحشنى الحضن بتاع بعد المدرسة .
وحشنى إنى أوقفهم علي السرير و ألبسهم وآخد بوسة وحضن .
وحشنى الخد علي الخد زي ما كانوا بيقولوا .
وحشنى وقفتهم علي إيد الكرسي اللي أنا قاعدة عليه .
وحشنى نطتهم و قاعدتهم علي حجري .
وحشنى الجري وراهم بالمعلقة وهام يامم .
وحشتنى الأسئلة الغريبة .

وحشنى غسيل الحيطة من كتاباتهم .
وحشنى فرحتهم باللعبة الجديدة .
وحشنى التدوير علي لبس العيد .
وحشنى منظر إيديهم الصغيرة و هما بيورونى العضلات .
وحشنى الهدوء بعد دوشة الحمام .
وحشنى فرحة عينيهم لما أجيب لهم شيكولاتة .
أكتر حاجة وحشتنى الحضن أيوه الحضن .

دلوقتي كل واحد في شغله و بيرجع تعبان ... باحط له الأكل ياكله من غير ماياخد باله أكل إيه ... بيسيب الأكل و ينام من التعب ... مع إنى تعبت في الأكل علشان أشوفه و هو بياكله .


با بقي مستنية يقوللي الله زي زمان بس بيبقوا مشغولين
في التليفون ! وحشنى إنهم يصحوا بالليل ييجوا علي سريري دلوقت باصحى الصبح الاقيهم نزلوا !

وأكتر حاجة بتزعلنى الحضن ... بقيت أقصر منهم و مش طايلة أحضنهم ... بقيت أقصر منهم و مش عارفة أحضنهم
وهما بقوا مشغولين .

ونفسي نفسي في لحظة من بتوع زمان آخد حضن واحد من خدهم الناعم ... وضحكة من عينيهم البريئة اللي مافيش فيها غير صورة ماما .

إوعوا تقولوا تعبنا من الولاد ... استمتعوا ... استمتعوا بالتعب الجميل قبل ماتبقوا أدي ... وتحاولوا تشبوا علي طراطيف صوابعكم علشان تاخدوا حضن ... او تحاولوا تغلسوا علي واحد يمكن يقف يتكلم معاك ... او تقف بالساعات تطبخ أكلة ماحدش فاضي ياكلها !
رد مع اقتباس
إضافة رد


الانتقال السريع

قد تكون مهتم بالمواضيع التالية ايضاً
الموضوع كاتب الموضوع المنتدى مشاركات آخر مشاركة
استمتعوا بجمال صور احد الشعانين بالذكاء الاصطناعي walaa farouk صور السيد المسيح والصليب 1 26 - 07 - 2024 08:04 PM
استمتعوا بالحياة ميرو ركن أرشيف المواضيع 1 29 - 07 - 2018 02:51 PM
استمتعوا بالتسعة والتسعين نعمه Rena Jesus قصص مسيحية متنوعة 5 08 - 07 - 2018 08:37 AM
استمتعوا بالحياة في كل فصولها وفي كل لحظة منها Mary Naeem موسوعة توبيكات مميزة 2 03 - 01 - 2018 01:08 PM
للحصول على جسم نحيف استمتعوا بشاي الثوم!! Mary Naeem الجمال والمكياج 0 14 - 03 - 2016 03:34 PM


الساعة الآن 09:39 AM


Powered by vBulletin® Copyright ©2000 - 2025