اية اللى بيحصل لما الكبار يتخانقوه قدام الاطفال

[walaa farouk]

كل طفل له أسلوبه و طريقته المختلفة عن طفل تانى، فيه طفل هيسمع و يسكت و ميشاركش فى الخناقة و طفل تانى هتلاقيه اتعصب و صرخ و قال للكبار بس اسكتوا أو يعبر عن غضبه و يقول تعبتونى أو ياخد صف طرف ضد الطرف التانى و دة هيحققله مكسب أن غضبه هيكون له لزمة او مبرر (مع أن فى الحقيقة مش مع طرف ضد طرف لكن محتاج يخرج شحنة سلبية و صريخ و زعيق مكتوم و مُتعب جواه و غالبا هيكبر كده ..شخص انفعالى صاحب ردود أفعال مضطربة).

فيه شوية حاجات محتاجين ناخد بالنا منها
١* الكبار لما بيتخانقوا قدام الطفل و كل ما كان سن الطفل صغير هيوصله رسالة واحده بس (كل دة بسببك انت)
و هيفقد الطفل الامان و مش بس كده ده هيكرهه او يضايق من وجوده و هيحس بذنب أن هو السبب(أيا كانت الخناقة على أية)

٢*الطفل هيفقد شعور الاستقرار..بالمعنى البسيط هيبقى قاعد قلقان مش عارف من أين تأتى الخناقة الجاية و متوتر كأنه عاوز يلحق أو يتفادى حاجة مش قادر يحدد بوادر ظهورها أو توقيتها(قاعد على كف عفريت يعنى)

٣*الطفل بيخاف و الخوف بيوصله ل (تهتهة/تبول لا ارادى/ panic attack /عزلة/خوف من الناس) و لو شبع خوف فى صغرة هيكبر شخص عنده مشكلات سلوكية (رهاب اجتماعى/قلة ثقة بالنفس/افكار مغلوطة أو وسواسية عن الآخر/متذبذب فى العلاقات/تابع بلا رأى/بيسترضى الناس بأى ثمن/و الأخطر بيطلع شخص ودود و محب و خدوم للكل _بشكل مزيف جدا حتى و هو مش واعى)

٤*الطفل اللى شاف الإساءة بيوصل لنفس السلوكيات بتاعه الطفل اللى اتعرض و وقع عليه إساءة
يعنى شاف ضرب كأنه هو اتضرب بالظبط.

٥*النقطة الإيجابية بقى 😊
الطفل لما بيشوف طرفين الخناقة و هما بيتصالحوه و يضحكوا تانى لبعض بيحس بمشاعر ارتياح و بيفهم أن الخناقة موصلتش لكارثة ولا حاجة..بس نخلى بالنا أن التكرار فى الخناقات هينزع شعور الارتياح من الطفل بالتدريج.

طيب سؤال: دلوقتى اللى حصل حصل و اتخانقنا و بهدلنا الدنيا قدامه نعمل اية بقى؟
*هتروح للطفل و تقوله انا اسف جدا انك سمعت خناقة و كلام زى دة و اكيد ده قلقك و خوفك و ده حقك.
.لكن صدقنى دة كان سوء تفاهم و احنا هنحاول نحله عشان ميتكررش تانى و الحمدلله الدنيا تحت السيطرة و محصلش حاجة كبيرة و انقذنا الموقف (طبعا بكلمات متأكد أن ابنك هيفهمها)

*بتعتذر للطفل انك خوفته و ازعجته باللى حصل قدامه و فى اسوء الاحوال لو المشاكل مبتتحلش بين الأب و الأم..طمن طفلك انك بتحاول تتغير و هتقاوم أن ده يحصل تانى (الاب و الام)

*احذر تماما انك تاخد رأى الطفل فى اللى حصل (و اقصد بالطفل هنا أى سن تحت ١٦ سنة .
.ايون انت قريت الرقم صح ١٦)

*متقولش للطفل (اكيد اللى حصل ده ميخصكش فبطل قلبه الوش دى..
انت مالكش علاقة بالخناقة مضايق نفسك ليه..انت اكيد فاهم امك/ابوك ومش قافش طبعا صح!)

*احذر ان طرف ينقد طرف تانى قدام الطفل
(طول عمره منكد عليا/ طول عمرها بتاعه مشاكل)

*متلبسش الطفل مشاعرك: معلش يابنى هو دايما كاسر نفسنا/
متزعلش حبيبى هى امك مش بتعرف تقعد من غير ما تبوظلنا يومنا (متجمعش)

*مينفعش تخرج انفعالاتك فى الطفل: اتزعقلك ف تزعقله

*متهربش من اللى عملته فى ابنك: متبصليش كده دة مش ذنبى انا ..كنت اعمل اية يعنى

(الكلام ده اغلبه ينفع أى سن مش الاطفال بس..يعنى حتى ولادك الكبار الشباب هيفضل جواهم شروخ و وجع بيحصل مع كل خناقة بتتخانقوها فى البيت قصادهم..بس كل سن هيعبر عن سلوكه و مشاعره بشكل مختلف ينفع مع سنه )