قصة برج بابل ( اسكتش للاطفال )

[walaa farouk]

آية الحفظ : هلم نبن لأنفسنا مدينة وبرجا رأسه بالسماء .
الشخصيات : الراوى - متحدث 1 و 2 و 3 - شخص 1 و 2 - صوت الله .
الراوى: في كل لحظة من كل يوم علينا إننا نختار اختيار إما إننا نخدم ربنا أو نخدم نفسنا ..
. وفي قصة انهاردة من العهد القديم الناس اعتقد إنها مش محتاجة تطيع ربنا بعد كده.

متحدث 1 : يللا كل الناس تتجمع.

متحدث 2 : عندنا حاجة مهمة عايزين نقولها ،وكلكم محتاجين تسمعوها.

الجمهور : )بيتمتموا وبيسألوا بعضهم ) إيه هي ؟ إيه إللي حصل ؟

متحدث 1 : احنا عشنا هنا في أرض شنعار لسنين طويلة.

متحدث 2 : واشتغلنا مع بعض عشان نبني المدينة العظيمة دي.

متحدث 3 : بصوا حواليكوا وشوفوا أد إيه إحنا عظماء ،بنينا حاجات عظيمة من ولا حاجة.

متحدث 2 : ) بيكلم الجمهور وبينصحهم) بصوا وشوفوا إحنا بقينا أد إيه أقوياء.

متحدث 3 : ( بيكلم الجمهور وبينصحهم ) وعملنا كل ده بنفسنا
ما احتاجناش مساعدة من حد ولا حتى من ربنا.

أصوات الجمهور...

متحدث 1 : أيوة صح ... إحنا نقدر نبني أي حاجة إحنا عايزينها.

متحدث 2 : إحنا بدأنا بس ... فكروا إحنا ممكن نعمل أد إيه

...هتاف بصوت عال

متحدث 1 : اسمعوا يا أصدقائي ... السما مش بعيدة عن الأرض ...
خلينا نبني برج نوصل بيه للسما ونصعد لحد القمة ونبقى زي ربنا.

...هتاف بصوت عال

متحدث 2 : هنستخدم قوالب بدل مانقطع من الصخور وبكده
مش بس هيكون قوي لكن هنخلص بسرعة وقريب كل الناس هتعرف إننا خلصنا.

متحدث 3 : هنبقى مشهورين والناس هتحكي عننا قصص عظيمة ،
مش هنكون متبعترين ( متفرقين ) في العالم ، نقدر نعيش هنا ونعمل أي حاجة إحنا عايزينها.
... هتاف

الكل : يللا نشتغل كلنا يللا بينا يللا نبدأ ... نقدر ننجزها مع بعض مش محتاجين ربنا.

الراوي: الناس كان بتبني البرج عشان تمجد نفسها ، اختاروا لنفسهم :
هما مش عايزين يمجدوا ربنا. لكن ربنا شاف قلوبهم
ومش هيسمحلهم انهم يكملوا في الخطية ويسخروا من ربنا. ربنا كان عايزهم يطيعوه ويملوا الأرض.

الله: الناس دي بتشتغل مع بعض عشان كلهم بيتكلموا نفس اللغة ودي البداية
وقريب هيكونوا قادرين يعملوا أي حاجة عايزين يعملوها.
عشان كده يللا ننزل ونلخبطهم بإننا نخليهم يتكلموا لغات مختلفة ...
وبكده مش هيكونوا قادرين يفهموا بعض.

متحدث 1 : باقولك ! ممكن تجيبلي قوالب أكتر لو سمحت.

متحدث 2 : ( لغة تانية ) أنا مش فاهم إنت عايز إيه !

متحدث 3 : ( لغة تالتة ) إنت بتقول إيه ؟

شخص 1 : ( لغة رابعة ) إيه إللي حصل ؟ ليه مش عارف تفهمني ؟

متحدث 1 : أنا هاخد أسرتي وهامشي ... إنتوا مجانين!

الراوي: ووقفوا بناء برجهم العالي لأنهم حتى ماقدروش يتكلموا مع بعض .
وعشان كده اتسمت بابل إللي هي معناها بلبلة ( لخبطة )
لأن الله بلبل لغتهم وبعد كده اتفرقوا في الأرض كله