تشخيص حالة

[walaa farouk]

لما ضغطنا بيعلى أو بيوطى
غالبا بنروح لدكتور الباطنة ولما أسناننا بتوجعنا
بنروح لدكتور الاسنان ( اللي بنخاف من ألمها )،
بس غالباً بعكس ضغط دمنا.. مبنعرفش نميز ( ضغط نفسيتنا )
وبنتصرف تصرفات معينة.. أغلبها لا إرادية
علشان نسكن شوية بيها تعب وألم ضغطنا النفسي،
لكن عندي خَبر حلو ليك ..إنك في أغلب الحالات
مش محتاج تروح لدكتور علشان تشخص نفسك
هل انت مضغوط نفسيا أو لا ..لأنك ببساطة تقدر تلاحظ نفسك
وانت بتلجأ لا إراديا لحيلة أو أكتر من الحيل الدفاعية دي
علشان تقلل ضغطتك وتوترك زي
1- ( الكبت )
اللي بيخليك تشيل وتدفن ضيقك وزعلك من حاجة جواك
من غير ما تعبر عن ده بطريقة صح
ومع الوقت كتر الكبت بيولد الإنفجار على أبسط الحاجات!

2- ( الإسقاط )
اللي بيخليك تُسقط مشكلة معينة عندك
على حد تاني قريب منك أو حتى بعيد..
على أساس إنها مشكلته هو مش مشكلتك انت
علشان ترتاح مؤقتا أو بطريقة مزيفة
من ضغط المشكلة اللي عندك في شخصيتك

3- ( التبرير )
وهو إنك تحاول تلاقي سبب منطقي أو مقبول إجتماعيا
لسلوك غلط أو حاجة إنت عملتها
علشان ترتاح شوية من تأنيب ضميرك ليها.. وهكذا
طبعا تقدر تكمل عادي في استخدام الحيل الدفاعية دي
في التعامل مع ضغطتك.. لكن للأسف هتفضل تعبان برضو
والمشكلة مش هتتعالج وبالعكس وارد جداً تكبر
وتتفاقم وتتعبك أكتر.. ها هتختار إيه؟
تهرب من ضغوطك بالحيل النفسية، ولا تواجه ضغوطك؟