لمتل هالأوقات خاصّةً تركتلنا جسدك ودمّك ملجأ ومرجع خلاص

[Mary Naeem]

لمتل هالأوقات خاصّةً تركتلنا جسدك ودمّك ملجأ ومرجع خلاص

يا سيّد الزّمان وكلّ الكون، يا سيّد الممكن والمستحيل، يا ضابط الكلّ وفادي الكلّ يا رحوم ارحمنا

لمتل هالأوقات خاصّةً تركتلنا جسدك ودمّك ملجا ومرجع خلاص. منشكرك يا ربّ لمتل هالعواصف سكنت بالكنايس حتّى تقول لكلّ اللّي بيآمنو بمحبتك أنا معكن بقلب مصاعبكن ما تخافو هي بتزول وأنا باقي إلكن ومعكن.
لمتل قلوبنا المحتارة والخايفة بقيت عالأرض ببيت القربان عربون ابوّة وحضن أمّ، حتّى تمرق موجات العنف والغضب وما تترك مرارة وكفر.
يا سيّد الزّمان وكلّ الكون، يا سيّد الممكن والمستحيل، يا ضابط الكلّ وفادي الكلّ يا رحوم ارحمنا.
الكلّ أخطأوا، جايين ومعنا توبتنا وايماننا.
جايين نطلب منّك تفتدي شعبك المعذّب الجوعان، الخايف المجروح شعبك اليتيم والمقهور، شعبك الظالم والمظلوم. ايدينا يا ربّ ما بتملك إلّا عطاياك.
وحدك قادر تعطينا نعمة السّلام متل ما بتعطينا جسدك ودمّك بالقداس بدون استحقاق انّما بفيض من رحمتك.
منذكر يا ربّ كلّ البلدان اللّي شعوبها عم بتعاني من الوباء، من البطالة والغلا، من العوز والمرض، من الحرايق، من غضب البراكين، من ظلم الحكم ولامبالاة القادرين.
ومتل ما خلقت أمّنا مريم أناء للكرامة أناء للمجد أناء للاهوتك، اخلقنا يا ربّ من جديد أجساد للشّهادة، ونفوس لمجدك وللحياة الأبديّة، آمين.