عشقت ذنوبي عندما رأيت إيمانكم المزيف

[walaa farouk]

عشقت ذنوبي عندما رأيت إيمانكم المزيف.


المقوله دي استوقفتني للتامل عمال اسال حالي ازاي واحد يعشق ذنوبه
لما يشوف ايمان غيره المزيف

بس لما اتعمقت فيها لقيت دماغي راحت للمرأة الخاطية

التي امسكت في ذات الفعل ( في الزنا)

ولما شعب اليهود ورؤساء الكهنة عرفوا بكده
كلهم اتلموا عليها علشان ينهشوا في لحمها ويرجموها بالحجارة

لكن جه السيد المسيح له كل المجد وسترها برداءه

وقالهم من منكم بلا خطية فليرجمها بحجر

وكتب خطية كل واحد منهم علي الارض

لما حسوا نفسهم اتفضحوا مشيوا كلهم من سكات

وقوم المرأة الخاطية وقالها اما دانك احد

قالت له لا... فقالها ولا انا ادينك اذهبي ولا تعودي تخطئي

جريت وهي فرحانه بخلاص نفسها وقبول المسيح ليها ونسيت الطين اللي كانت عايشه فيه

وبقت من اللي بيبشروا باسمه وقصتها في الانجيل بنتحاكي بيها علي مدي العصور
والازمنه ايمانها كان حقيقي مش زيف

كمان افتكرت ساكبة الطيب لما دخلت احد بيوت الفريسين

وكان معاها عطر الناردين غالي الثمن وسكبته علي قدمي السيد المسيح
وغسلت رجليه بدموع توبتها

ففكر الفريسي في نفسه وقال لو كان المسيح يعرف حقيقة الست دي
مكانش سمحلها تلمسه وعرف السيد المسيح افكاره

وقاله انا دخلت بيتك وماء لرجلي لم تاتني به اما هي فغسلت قدمي بدموعها
..الفكرة هنا ان انت لو بتحب ربنا وليك مظهر العبادة
وقالوا عليك فلان راح الكنيسه يصلي فلان راجع من الصلاة
ومعروف وسطهم بس معندكش رحمه وبتكرم ربنا بس بالكلام صدقوني ده غير مقبول عند ربنا

هنبقي بينطبق علينا قول السيد المسيح شعب يعبدني بشفتيه

بيكون فينا العِبر ومش حاسين بحالنا وبندين بس غيرنا لمجرد كشفنا خطيتهم وعرفناها

عايز ربنا يحبك خلي ايمانك من قلبك ..غفرانك من قلبك

خلي عندك رحمه ومحبه للناس مهما كانت دوافعهم

متبقاش منافق في عبادتك قدام الناس علشان تظهر انك حلو وبس

مدينش غيرك واستر عليه علشان يسترك ربنا

ده لولا ستر ربنا عليك كان فضح حتي افكارك

وده اللي هيحصل في اليوم الاخير لما هيجي المسيح يدين العالم
كل افكارنا حتي اللي متحولتش لفعل هتكون مكشوفه امامه وامام الناس ..تخيل كده انت وهي وانا

لو كنت بتفكر افكار حقد سرقه خيانه ادانه حسد ذم

كراهيه زنا كل ده هيتكشف

عشان كده دوستوفيسكي قال عشقت ذنوبي عندنا رايت ايمانكم المزيف

العشار قال كلمتين بمذلة ودموع ( ارحمني يا الله انا الخاطي)

ربنا قبل صلاته

الفريسي وهو بيصلي كان بيقول
( اشكرك يا رب ان مش زي فلان وفلان واني بديك العشور وبدفع وبعطي وبعمل وبعمل

لكن صلاته مكانتش مقبوله

صلي بانسحاق ودموع واتضاع صلاتك تتقبل

هتصلي بتكبر وبر ذاتي صلاتك لن يسمعها الله