الطلاق مش بس للازواج

[walaa farouk]

لما صاحبك يخون عشرتك و يستقل بمشاعرك و يديك ضهره
بتكمل تحبه لكن بيحصل بينكم "طلاق نفسي" ،
قرار بيحصل غصب عنك جوه عقلك انك مش ح تدي له الأمان و لا الثقة تاني .
. تسلم عليه و تخدمه كواجب الحب ، لكنك "طلقته" من عشرتك و "أطلقته" من حساباتك ..

كده برضه علاقتك بقرايبك، فيه اللي بتقربه لقلبك لانه شهم و خدوم و راجل
، و فيه اللي عرفته علي حقيقته، تحبه بجد ، لكن برضه "تطلقه "
و تطلعه من حساباتك، تسأل عليه بأمانة الحب
لكن ما تديلوش الأمان و ما تأتمنوش علي سرك ..

كده برضه بيحصل بين الناس و الخادم بتاعهم .. لو ما لقوش فيه القدوة و الثقة "بيطلقوه"
، يعني يكملوا في حبهم ليه لكن يبطلوا يسمعوه و يصدقوه و يقربوا منه ؛
بقاله شلة قافلة عليه، و لبس دور الممثل و بقي بيقول كلام و يعمل عكسه.
. هنا برضه بيحصل "الطلاق النفسي" بينه و بين الناس ..

نفس الكلام بيحصل في الشغل مع مدير ما بيعرفش يحب و يشجع و يحس بالناس ،
أو مع ممثل في السينما ما احترمش شغله و لا البيوت اللي بيخشها من شاشتها،
و مع المذيع اللي ما اداش شغله حقه و استهون بالناس اللي كبرته،
و مع اي شخص في اي مسؤلية أو علاقة بالناس و ما حبهمش و قدرهم و كبرهم..

خللي بالك من نفسك : فيه ناس كتير حواليك ممكن تكون قريبة جدا منك
لكن بسبب أعمالك و عدم عنايتك بيهم "طلقتك" من قلبها
و "طلعتك " من حياتها حتي من غير ما تقولك أو تصارحك ..

يا تصلح حياتك و ترجع تاني تحبهم و تحترمهم، يا تدفع تمن بعدهم عنك .

[Mary Naeem]

يا تصلح حياتك و ترجع تاني تحبهم و تحترمهم، يا تدفع تمن بعدهم عنك

صح يا قمر
ربنا يباركك حببتي

[walaa farouk]

ميرسى على مرورك الغالى