ربنا مش بتاع لفق ( متلفقش خيط باناقة )

[walaa farouk]

حزقيا ربنا قاله أنه خلاص حيموت و كان لسه في شبابه
. صعبت عليه نفسه و حس أنه مالحقش يعيش
..شرح ده في صلاته بعد ما ربنا مد له العمر ١٥ سنة و قال من ضمن كلامه
لَفَفْتُ كَالْحَائِكِ حَيَاتِي..
لَفَقَ الثوب مثلا معناه أن يضُم شُقة إلى أخرى فيخيطها
. الستات تعرف أن اللفق في الخياطة زى السراجة كده حاجة مش متينة ..
خياطة مؤقتة المفروض لغاية ما تتخيط كويس و أن اللفق عمره مش كتير و القماشة تتفتح تانى
.. و ساعات يعملها الخياط لغاية ما يعمل بروفة للزبون و بعدين يخيط الخياطة النهائية
.. و النص الانجليزى
Like a weaver I have rolled up my life,
يعنى لم القماشة خلاص أو لفها أو لفقها ..
يعنى حزقيا حب يقول ان حياته اتلفقت ..اتكروتت
.. و لما يقولك ده بيلفق الكلام ...يعنى بيكذب ما بيقولش الحقيقة ..
احنا بقة شغالين في اللفق ده زى الحائك
كل حاجة بنعملها ...بتبقي لفق ..سراجه..
و اكيد ما بيعديش وقت الا و تفك ..
بنلفق علاقتنا بربنا ..شوية التزامات روحية تخدر ضمايرنا و نلفق العلاقة
..تناول و عشور و خدمة و صلاة من الاجبية بنظام اللفق
..اللفق كروتة ..غرزة بعيدة عن غرزة
.. قداس نظبط على قبل الانجيل بس شغل باكر و الحمل لا مش بتاعنا ده ابونا و الشمامسة بيسخنوا
..ابونا يبخر و الشماس يلف وراه تسخين كده لغاية الشعب ما ييجى .
.كتاب مقدس بنقراه بس لفق ..نص الكلام كروتة ونصه بنقراه غلط
..و بنوة من نبوة مش فارقة يعنى ماجتش سينا من سونيا
..اعتراف لفق ..ما فيش نية اصلا للتوبة بس بنريح الضمير و ندلق شوية من الحمولة .
.علاقتنا ببعضنا لفق ..بصوا على حالنا و خصامنا و انفصالنا حتى لو مع بعض عيلةيعنى.
..لفق ..تمشية أمور ..خدمة لفق ..افتقاد من غير روح و لا غيرة بجد و تسديد خانات
و كلمتين يتحضروا و ندلق و نهتم بشوية أنشطة و يتنسي المسيح فيها
و تبقي الأنشطة هدف و خناقات و صراعات و كل واحد بيشتغل في جزيرة بعيدةعن التانى
..مشاعرإنسانية..لفق
بقينا بنعزى بعض على الفيسبوك و نهنى بعض على الواتساب
..و حاجة ماسخة ..حياة ممشينها لفق .. شغل لفق جودة لفق و تعاملات لفق ..
علاقات اجتماعية لفق و مصلحتى و مصلحتك ..محبة لفق
..مجاملات لفق ..و ماحدش راضي يمسك الخيط و يتبت الخياطة
..نص المزمور بيتقرى و الودن مطرطقة مع اللى بيحصل في الصالة و لا صوت الماتش ..
نهاية اللفق ..اوصي بيتك ..حتمشى ...نهاية اللفق حتى لو مد في عمرك
حتخلف منسي بس حيعبد اوثان و يبقي ملك خراب على إسرائيل .
.ربنا مش بتاع لفق ...لما حوا و ادم يتغطوا بورق الشجر قالهم
..ده لفق شوية و يقع و تتعروا ..و راح غطاهم بجلد ذبيحة
و هو نفسه صار ذبيحا لكى يغطينا و يسترنا كحائك ماهر ..
فيه مناطق كتير في حياتنا خلاص على اخر حتة في الخيط و اللفق حيفك .
.نلحق نضم الشقتين و نخيطهم بجد ..شقتنا على ربنا و شقتنا على بعضنا .
.الموت مش حيدى فرصة حد يخيط حاجة و لا يسترجع حاجة ..
بدل ما نطلب عمر طويل متلفق نطلب عمر حتى لو قصير بس متحاك بأناقة
و لما نروح السما يبقي لباسنا ابيض و موشى بالذهب مش يتقال لنا بعد الشر ايه اللى انت لابسه ده
..ده مش ثياب العرس

[Mary Naeem]

و لما نروح السما يبقي لباسنا ابيض و موشى بالذهب مش يتقال لنا بعد الشر ايه اللى انت لابسه ده
..ده مش ثياب العرس

ربنا يبارك حياتك

[walaa farouk]

ميرسى على مرورك الغالى