الأمومة مش سهلة بس مستهله

[walaa farouk]

#هو_فيه_لسه_أم_متعرفش !!
📍أول سنة 📍

☝️هو فيه لسه أم متعرفش !!
ان الطفل لما بيتولد بياخد
حقنة فيتامين ك عضل او بالفم في المستشفي
والجرعة الصفرية للإلتهاب الكبدي ب عضل ونقطتين شلل الأطفال بالفم في مكتب الصحة

☝️هو فيه لسه أم متعرفش !!
ان (السرسوب) كافي جداً للطفل في أول ٧٢ ساعة ،، وفكرة الببرونة في الوقت دا سواء للأعشاب أو اللبن الصناعي غلط غلط غلط 😡،، لأن الطفل بيلاقي مصدر اسهل وبمجهود قليل يبدأ يتعود عليها،، حطيه ع صدرك كل ساعة واصبري عليه دا انتوا لسه بتتعرفوا ع بعض 😂

☝️هو فيه لسه أم متعرفش !!
رفقاء الدرب
محلول الملح ،، وظيفته تسليك الأنف
سيمثيكون ،، للإنتفاخ
أي كريم فيه زنك ،، وقايه للتسخلات
فيتامين د ،، ٤ نقط يومياً في أول سنة

☝️هو فيه لسه أم متعرفش !!
أن الرضاعة أساس الطفل وإهتمامك بتغذية نفسك مهمة،، ابعدي عن المسبك والموالح والشيكولاته والمياة الغازية ،، الحاجات دي بتساعد في زيادة المغص والانتفاخ مع الطفل من خلال الرضاعة،،
كلي بلح وعجوه وحلاوة طحينية وجرجير واشربي لبن وحلبة ومياة كتير هيزود ادارار اللبن 👌

☝️هو فيه لسه أم متعرفش !!
ان الصفرا الفسيولوجية علاجها الرضاعه وبس وبس ،، مع المتابعه مع الدكتور بتاعنا
واللي هيقولي لمبه هكهربه 👿

☝️هو فيه لسه أم متعرفش !!
ان وقت الرضاعة من ١٠-٢٠ دقيقة من الثدي الواحد علشان نضمن وصوله للبن نهاية الرضعه اللي كله بروتينات مفيدة لزيادة الوزن وراحة بطن الطفل ،،، رَضع خلاص ،، كرعتيه ،، لأ ،، مش لازم يطلع صوت يسمع الجيران 🤦‍♂️ وهو بيتكرع ،، نيمية من غير مخده افضل ،، برافو عليكي 👍

☝️هو فيه لسه أم متعرفش !!
🔹فيتامين د ( ڤيدروب )
اول سنه ٤ نقط يومياً
تاني وتالت سنه ٦ نقط يومياً
🔹الحديد
من الشهر السادس ١١مجم =ربع قطارة هيدروفرين او انريتش يومياً
🔹فيتامين أ
*مع تطعيم ال ٩ شهور،، ١٠٠ الف وحده = ٢ كبسولة أ-ڤيتون ،،مأخدوش في الصحه هاتيه انتي واديله
*علي سن سنة ونص ٢٠٠ الف وحدة =٤ كبسولات أ-ڤيتون
وممن يتكرر كل ٦-١٢ شهر لسن ٥ سنوات
🔹الكالسيوم ،، لو الطفل بيرضع ٣٠٠ سم لبن فدا كافي جداً.. ولو هياخد لازم يكون محتاج

☝️هو فيه لسه أم متعرفش !!
أن فيتامين د والأوميجا٣ للأم
مفيد جداً جداً ليها وللطفل أثناء فترة الرضاعه 👌

☝️هو فيه لسه أم متعرفش !!
🔹ان التطور الحركي
٣شهور يصلب راسه
٦شهور يقعد مسنود
٧شهور يقعد لوحده
سنه يقف مسنود
سنه و٣شهور لسنه و٨ شهور يمشي
والتأخر يعدي الفتره المذكوره
أه الزحف خرج برا التطور الحركي يعني مش لازم يزحف

🔹ان التسنين من ٦ شهور لسنه
ومنقولش اتأخر غير لو مفيش ولا سنه طلعت ووصل ١٣ شهر

🔹أتأخر فعلا في التسنين او التطور الحركي ،، روحي لدكتور يطمن عليه وهيعمله تحاليل يشوف نسب الكالسيوم وفيتامين د ويستبعد مشكله في الجهاز العصبي

☝️هو فيه لسه أم متعرفش !!
ان التطعيمات الإختيارية عندنا ،،إجبارية في كل مكان في العالم ،، يعني مش سبوبه وربنا 😏
📍تطعيم روتا ،،ضد فيروس روتا اللي بيسبب نزله معوية وبيتاخد علي جرعتين بالفم لو روتاركس و٣ جرعات لو روتاتك ،، والاتنين كويسين
📍مكورات رئوية،، ودي بكتيريا بتسبب ٤ امراض التهاب رئوي-التهاب سحائي-التهاب اذن وسطي-تسمم دم
ودا منه نوعين بريڤنار-سينفلوريكس
وبيكون حقن عضل والاتنين تمام

☝️هو فيه لسه أم متعرفش !!
📍موضوع السيتال قبل التطعيم بطلناه وطلع بيأثر علي فاعلية التطعيم،، فنخلي السيتال بعد التطعيم وعند اللزوم لو فيه حراره عاليه او صراخ غير طبيعي من الالم
📍تطعيم الدرن لازم قبل الاربعين يوم- ولو مسبش علامه نستني لسن سنه ونعمل اختبار الدرن ولو نتيجته نيجاتيف يكرره
📍تطعيمات المبتسرين بتبدأ من العمر الزمني والله العظيم 🙏🏻 زي باقي الاطفال،، الشهرين بعد شهرين مش بعد ٤ واصله نازل ناقص والكلام الفاكس دا ،،هو اولي انه ياخدها علشان مناعته القليله ،، بنشوف مهازل للاسف
📍ان تطعيم شلل الأطفال ليه جرعات تنشيطية مرتين في السنه لسن ٥ سنوات
يعني ياتلتزمي بالحملات اللي بتنزل من الصحة مرتين في السنه،، يا تخديه برا

👌هو فيه لسه أم متعرفش !!
ان مش كل بكا للطفل معناه انه جعان وهوووب لبن صناعي ،،، ادخال اللبن الصناعي للطفل محتاج اثبات ان الطفل مش بيزيد مع لبن الأم بالمعدل الطبيعي بعد تظبيط غذا الأم ووضعيات الرضاعه ومدرات اللبن ،، كل دا ومفيش نتيجه بندخل الصناعي

☝️هو فيه لسه أم متعرفش !!
وهي بترضع صناعي ان انسب نوع لبن للطفل اللي بيحقق الوزن المطلوب ،، رخيص بقا غالي مش هتفرق المهم يكون بيزوده وبيريحه 👍
لما تفتحي العلبة شوفي البودره مش كتل وريحتها كويسه ،،مشاكل سوء التخزين كتيير،،لو بتحضري الببرونة بمياه عاديه اغليها ٥-١٠ دقايق ولو معدنيه دفيها ١-٢ دقيقة،،كل مكيال ليه معدل ميه معين ،، الشائع ٣٠ مل = مكيال ،، القليل ٦٠مل=مكيال،، القليل جدا ٢٥مل =مكيال،، ديماً اتأكدي من علي العلبة،، هاتي ببرونه مضادة للأنتفاخ أفضل وهتفرق ،، واللبن الباقي بعض الرضاعه حطي الببرونه في علبه فيها مياه دافيه او حافظه واخرها ساعه،، كل شهر بنزود معدل حجم الرضعه من ٢٠-٢٥ سم خدي بالك

☝️هو فيه لسه أم متعرفش !!
ان مش كل شوية مغص او انتفاخ او ترجيع وتسلخات نجري نقول حساسية ألبان ،، الموضوع بقا أوفر شويتين 🤦‍♂️
تشخيص حساسية الألبان بيحتاج وجود عرضين متكررين في جهازين مختلفين من الأجهزة ال ٣..هضمي-جلد-تنفسي
فلو لقينا مثلا
ارتجاع (هضمي) مع اكزيما (جلد)...او
اسهال (هضمي) مع كحة متكرره (تنفسي)

ودا اللي أقرته الجمعية الاوروبيه لامراض الجهاز الهضمي ،، ففي الحاله دي من حقي اشك وامنع الام من منتجات البروتين البقري ونتابع التحسن بعد المنع ب ١٠-١٤ يوم

☝️هو فيه لسه أم متعرفش !!
*ان ادخال الاكل من ٤-٦ شهور
*ولازم يكون بالطبق والملعقه
*وميأثرش علي عدد رضاعته لان الاصل الرضاعه
*وان الاكل يكون مسلوق في مياه بدون ملح او سكر
*وان الزبادي مش ممنوع بس بشروووط
*ومع كل صنف جديد نطبق قاعدة الاربع ايام مع ملاحظة الطفل لوحصله تحسس ع شكل اسهال او امساك او مغص او احمرار في الجلد فنمنعه
*والطفل يشرب ميه مع بداية ادخال الاكل مش قبل كدا

☝️هو فيه لسه أم متعرفش !!
*المبتسرين بيتولدوا قبل ٣٧ اسبوع من الحمل
،، قليلي الوزن وزنهم بيكون اقل من ٢.٥كجم
* محتاجين معامله خاصه وبالاخص درجة الحراره ...لازم تدفئه ...ورضاعتهم بتكون بأسلوب معين لان مقدرتهم علي المص بتكون ضعيفه وغالبا بنشفط لبن الام وبياخدوا لبن خاص بيهم premature....وبنزود حجم الرضعه🍼 تدريجي علشان ميحصلش مشاكل في الامعاء...وبنطمن لما وزنهم بيزيد فوق ٢.٥كجم وبنغير اللبن لانواع تتناسب معاهم ....لازم ياخدوا فيتامينات من اول يوم تحتوي علي فيتامين A,K,E,D وحديد...👍

☝️هو فيه لسه أم متعرفش !!
🔹الوزن الطبيعي للولاده من ٢.٥-٣.٥ كجم
وبيزيد في اول ٤ شهور ٣ كجم بمعدل ٧٥٠ جم في الشهر
وتاني ٤ شهور ٢ كجم بمعدل ٥٠٠ جم في الشهر
وتالت ٤ شهور ١ كجم بمعدل ٢٥٠ جم في الشهر

🔹الطول
الولاده حوالي ٥٠ سم
وفي اول ٦ شهور بيزيد من ١٢-١٥ سم بمعدل
٢ -٢.٥ سم كل شهر
وتاني ٦ شهور حوالي ٩ سم بمعدل ١.٥
سم كل شهر

🔹قطر الراس
عند الولادة ٣٤-٣٥ سم
٦شهور ٤٤سم
سنه ٤٧ سم (نيلسون ٢٠١٦)

طبعا كل القياسات اللي اتكلمنا عليها تُحدد من خلال منحني النمو اللي من خلاله نقدر نقول فيه مشكله ام لا...الموضوع فيه variations شويه

☝️هو فيه لسه أم متعرفش !!
ان الأمومة مش سهلة ،، بس مستهله

[Mary Naeem]

âک‌ï¸ڈهو فيه لسه أم متعرفش !!
ان الأمومة مش سهلة ،، بس مستهله
ربنا يباركك

[walaa farouk]

ميرسى على مرورك الغالى