القواعد العشرون للأم أيام الامتحانات
١/ اشربي ينسون و كراوية كتير علشان تهدي أعصابك.
٢/ قللي فترة الموبايل لابنك و بنتك للحد الأدنى لأنه فعلا بيخليهم ينسوا بشكل كبير .
٣/ الزعيق هيوترهم و يعصبك أكتر ف لا هم فهموا و لا انتِ هديتي.
٤\ متراجعيش آخر اليوم. لأنك أصلا مش هيكون عندك طاقة تفتكري اسمك.
٥/ اشربي ينسون.
٦/ امنعي حلويات بعد ستة مساء .
٧/ متراجعيش معاهم بعد خناقة بينك و بين جوزك، علشان اللي مقدرتيش تقوليه لجوزك هتطلعيه ع العيال.. ملهمش ذنب يا ست الكل.
٨/ لو ابنك مقدرش يجاوب على كم سؤال و انتِ بتراجعيله، فده مش معناه أبدا إنه هيطلع فاشل و عتيد الإجرام و مطلوب أمنيا.
٩/ تقبلي فكرة إن فجأة و بلا أي مبرر منطقي طفلك ممكن يفاجئك قبل الامتحان مباشرة ان ٢×٥= ٣٠.. إوعي يغمى عليكِ، إوعي. ابتسمي بهدوء، و تمالكي أعصابك، و ياريت لو تحطي إيدك ورا ضهرك تجنبا للكمة مفاجأة على وشه.. و قوليله إن دار الإفتاء أعلنت الصبح إن ٥×٢=١٠.
١٠/ اشربي ينسون كتير.
١١/ لو انتبهتي فجأة إن خط طفلك نقش فراخ. انقذي ما يمكن إنقاذه بإنك توصيه يعمل مسافة مناسبة بين الكلمات و يكتب على السطر قدرالمستطاع علشان نحاول نحول الخط من هيروغليفي لحاجة شبه اللغة العربية.
١٢ اعملي بلوك لمصدر الكآبة و الضغط و الطاقة السلبية اللي في حياتك حتى لو كانت بنت خالتك أو جارتك طول فترة الامتحانات لأن الموضوع مش ناقص.
١٣/ جمعي كل أحذية البيت في مكان بعيد عن قعدتك مع طفلك و انتِ بتذاكريله.
١٤/ متفضليش باصة لابنك بتحفز و هو بيسمع لك لإن طبيعي في الحالة دي إنه ميفتكرش المنهج و أقصى حاجة ممكن يفتكرها ملامح أمنا الغولة.
١٥/ اشربي ينسون.
١٦/ مينفعش تصحيه تمنية الصبح و يفضل يذاكر و يروح دروس و يعمل واجبات بشكل متصل و بعدين يجيلك ذهول إنه ع الساعة عشرة بليل بيتعامل بتناحة !! هو طبيعي و انتِ أوفر.
١٧/ مفيش أي وجه علاقة أو ارتباط بين أيام الامتحانات و الكآبة.. اضحكي و ضحكيهم . هونيها تهون.
١٨/ و طفلك نازل الامتحان متفضليش تقوليله عايزة الدرجة النهائية، قوليله اعمل أقصى ما عندك .
١٩/ احضنيه و ادعيله قبل ما ينزل، مفيش داعي يبقى آخر ما يسمع تهديد ووعيد في حالة الفشل أو نقص الدرجات.
٢٠\ لو الينسون خلص، هاتي تاني و اشربي ينسون.
