.اوقات بتحس ان جسمك ده ابليس استخدمه كرسى ليه؟؟ فاكرين لما ابليس قال اضع كرسى فوق كرسى الله.. ماقدرش يعمل كده لكن لما تشعر ان بقى بيعمل كده فيا وفيك هى دى المؤلمه.. لما تحس ان الله بيقولك انت بتاعى وانا ابوك وفجاءه اروح انا باعد ربنا عنى ومخلى ابليس يجلس فيا وياخد راحته بكتشف دايما ان دى الحقيقه لما الجسد يعيش لرغبته ولشهوته بيتحول الجسد ده لحيوان وابليس بيجى ويركب على الحيوان ده ويقوده .. متخيل معايا المشهد ده لما ابليس يستعبدنى للشهوه ويخلينى حاجه يقودها او يخلينى كرسى يقعد عليه اكنه هو الملك صدقنى صعبه.. اوقات بقول طب يارب هو انت مش تقدر تزيح ابليس من فوقى وتقومنى ؟؟ ليه سايبنى طب ليه سايبه ؟ لما اسكت شويه بحس ان كل الاسئله اللى بقولها دى هى مجرد هروب من حاجه واحده بس وهى انى انا اللى بروح بنفسى للشهوه انا بروح بنفسى للخطيه بيبقى ربنا معايا وجنبى وساترنى وحامينى ومفرحنى وساندنى وانا اللى بنساه اوى اوى وبهرب من فكره انا السبب وانا اللى شهوانى وانا اللى ببعد نعمته عنى بحجه كلمه هو فين من ضعفى؟ مع ان ضعفك ده هو قال مش مهم تكفيك نعمتى.. بس انا اللى بقى زل ابليس مستهوينى وبقى عاده بستناها.. تعالوا نفضفض سوا حتى لو كل واحد من جواه.. فاكرين زمان واحنا صغيرين لما حياتنا كلها براءه وفرح .. فاكرين لما كنا ممكن نروح لربنا وقت فقرنا واحتياجنا ونصرخ له نقوله احنا بتوعك يارب.. فاكرين الاوقات اللى كنا عايشين فيها واحنا فرحانين مع ربنا بأبسط الاشياء ؟ طب فاكر لما كنت بتصلى كتير اوى وفجاءه صلاتك قلت شويه وكنا بنزعل ونقول ياريتنى ارجع زى الاول لانى صلاتى باقت قليله؟ اهو احنا حتى الصلاه القليله اللى كنا حاسينها ولا حاجه مابقتش موجوده دلوقتى وبقينا نفسنا حتى نرجع للايام اللى بنقول عليها عندنا فتور او بصلى بالعافيه دلوقتى حتى العافيه مابقتش موجوده... وصلنا لمرحله البروده اللى انا قرفان من نفسى بيها وهاتوصل حتى ربنا يقولى انت لا حار ولا بارد وصلنا للحاله اللى عاوزها ابليس انسان من غير روح .. انسان كل همه جسده شهوته اكله شربه فلوسه منظره قصاد الناس.. وصلنا لمرحله انى بقيت انسى ان يسوع خالق الطهاره صار منظرا للناس والملايكه عشانى وانا انهارده خليت منظرى بردو وحش بس قصاد السما وبجمل شكلى على الارض قصاد الناس.. وصلنا لمرحله اننا فاضين اوى وبندور على اشكال الروحيات علشان نرضى نفسنا ونرضى ضميرنا . اشكال الروحيات يعنى شويه خدمه على شويه ترانيم على شويه خناقات بأسم ان الخدمه م تتصلح والكلام ده لكن الحقيقى الفضى مالينا كلنا. وبندور على اشكال تخلى شكلنا ماليان لكن فى الحقيقه لا..وكل ما ابليس يبقى فوقى وانا تحتيه تلاقى نفسى بكابر ومش بصرخ لربنا لا عارفين ايه اللى بيحصل؟ الفلسفه تزيد وافضل ادور على ابار مشققه مافيهاش مايه عارفين يعنى ايه؟ الفلسفه تزيد يعني بان انى حد فاهم ومثقف وغيران على ربنا لكن من جوايا فااااضى فلسفه من غير روح ضياع...وعارفين يعنى بدور على ابار مشققه مافيهاش مايه ؟ يعنى بخدم وبعرق وتعبان ووقتى كله بحفر لكن فى الحقيقه تعب باطل لانى فاضى فبدور على الفاضى فاماكن فاضيه... احنا جوانا وجع كبير اوى اوى لا من الدنيا ولا من البلد ولا من الناس اللى جرحونا ولا من اخطاء من بعض الناس جوه الكنيسه لكن لو دورنا صح هانلاقى الوجع الحقيقى اننا فاضين اوى والروح حزين جوانا ومطفى خالص . عارفين لما الروح منور جوانا وفرحان مهما حصل بنبقى فرحانين مهما اتجرحنا نقول ده اكليل مهما ضاقت نقول كله باطل وقبض الريح . لكن لما الروح يبقى حزين ومطفى بنخبط فى اى حاجه علشان نبان بس اننا لسه عايشين لكن فى الحقيقه احنا ميتين بالحيا.. طب ايه الحل ؟ هل الحل بعد كل ده تبقى زى الافلام العربى البوليس يجى يقبض على الشرير فى اخر دقيقه من الفيلم والخير ينتصر؟ لا مش دى النهايه.. الحل اننا نبقى رجاله بقى مع ربنا نفوق ونصحى للابديه نرجع تانى نكرس القلب . نرجع تانى يبقى اليوم بتاعه والحياه بتاعته نرجع تانى نزيح ابليس من فوق كتافنا ونصلب طولنا ونصلب الاهواء والشهوات الحل اننا نعافر ونجاهد مايهمناش الدنيا واللى فيها ويهمنا السما بكل اللى فيها نرجع نقول لربنا احنا ولادك ورجالتك احنا بتوعك.. نرجع نملى يومنا بالكتب اللى رمناها اقوال الاباء وسيرتهم وعظاتهم نرجع تانى نفتح انجيلنا ونقرا ونتمتع ونكتب اللى جوانا لربنا زى زمان... نرجع تانى نقوله بنحبك ومالناش غيرك.. نرجع تانى للتناول وماتقوليش اصل ابونا مضايقينى عندك مليون كاهن غيرى وعندك مليون كنيسه.. بس روحك واحده دى لو ضاعت هاتبقى مشكله...ونسبنا سامحونى من القرف والطين اللى مالانا بيه ابليس وعايشنا فيه ايام كتير.. اه اتكسرنا بس الله قادر يجبر كسرنا .. ارجعوا اليا فارجع اليكم.. الموضوع مهم ليا وليكوا وليا انا صدقونى قبلكوا توبوا لانه قد اقتربب ملكوت الله.. لازم نفوق.. يلا بجد ننسى الايام والزل والكسره وعنينا اللى تملت من تراب العالم وقذارته ونفتح عنينا تانى على كلمه ربنا.. على الاقل لما يجى اليوم وربنا ياخد وديعتى يقولى كفايا عليك انك حاولت وماستسلمتش .. استطيع كل شى فى المسيح الذى يقوينى
04 - 10 - 2017, 11:57 PM
رد: عاوزين نرجع تانى لربنا
العرض العادي
