تأملات فى سفر التكوين الاصحاح الثالث

[بنتك يايسوع]

تأملات فى سفر التكوين الاصحاح الثالث

الايه 1
و كانت الحية أحيل جميع حيوانات البرية التي عملها الرب الإله فقالت للمرأة أحقا قال الله لا تأكلا من كل شجر الجنة
الايه دي بتوضح لينا جدا ذكاء الشيطان وازاى بيعرض علينا الخطيه بطريقه غير مباشره يعني لو الشيطان جه قالك يلا تعالى ازنى طبعا هاترفض وتقوله مستحيل اعمل كده طب لو اغراك وخلى واحده حلوه تعدي من قدامك واشتهيتها هاتفتكر ان دي حاجه بسيطه مع ان ربنا بيقولك بطريقه مباشرة من نظر لامراه ليشتهيها فقد زني بها فى قلبه يعني النظره بشهوة زيها زي الزني بس الشيطان جبهالك بطريقه تانيه مغلفه بزينه وده اللى عملته الحيه مع حوا لو قالتلها خدي كلى من شجره معرفة الخير و الشر كانت فورا هاترفض لكن بدهاء جات قالتلها هو فعلا ربنا قالكم متاكلوش من كللللل شجر الجنه مع انها عارفه كويس جدا ان ربنا منعهم من شجره واحده بس لكن كانت بتجر كلام مع حوا عشان تجيبلها الخطيه مغلفه

الايه 2 و 3
فقالت المرأة للحية من ثمر شجر الجنة نأكل وأما ثمر الشجرة التي في وسط الجنة فقال الله لا تأكلا منه ولا تمساه لئلا تموتا ردت حوا وقالتلها لا ربنا قالنا كلوا من كل شجر الجنه الا ثمر الشجره دي مينفعش ناكل منه لا وكمان لا تمسااااااه عشان متموتوش ايه ده ياحوا انتى عارفه الوصيه كويس جدااااا اهو و حافظاها كمان وفاكره كل حرف قالهولك ربنا !!

الايه 4 و 5
فقالت الحية للمرأة لن تموتا بل الله عالم أنه يوم تأكلان منه تنفتح أعينكما وتكونان كالله عارفين الخير والشر
ردت الحيه بسرعه لا مش هاتموتوا ده ربنا بس بيقولكم كده عشان لو اكلتوا منها هاتبقوا زيه عارفين الخير والشر طب يا حوا حاولتى تفكرى بعقلك ف الكلام اللى سمعتيه حتة حيه بتكدب الله اللى خلق ادم و خلقك و خلاكي تعيشي فى نعيم الجنه ده كله وبتقولك لا مش هاتموتوا مع ان ربنا قالهالكم صريحه لا تمساااااه لئلا تموتا طيب سيبنا من دي بتقولك ده ربنا بيقولك كده عشان لو اكلتوا هاتبقوا زيه تخيلي يعني خالق الكون بيحذركم من الاكل عشان خاااايف تبقوا زيه وحاشا لله طبعا انه يخاف بس للاسف هو ده اللى بيحصل وقت ما ناخد وندي مع الشيطان بنتحول لاغبيه فورا وعقلنا ممكن يصدق اى حاجه

الايه 6
فرأت المرأة أن الشجرة جيدة للأكل، وأنها بهجة للعيون، وأن الشجرة شهية للنظر. فأخذت من ثمرها وأكلت، وأعطت رجلها أيضا معها فأكل

و بالرغم ان الشجره كانت قدام حوا طول الوقت وكانت بالنسبالها حاجه عاديه جدا ومش بتفكر اصلا انها تقرب منها لكن بعد حوارها مع الحيه فجاه لقت الشجره شهيه للنظر وكمان مبهجه للعيون و جيده للاكل فورا نسيت الوصيه اللى لسه قايلاها للحيه بلسانها فورا نسيت تحذير ربنا فورا نسيت ربنا نفسه ربنا اللى خلقها و سابلها كل الحريه انها تاكل من كل الشجر ماعدا شجره واحده الكارثه الاكبر بقي مش تكتفى ان هى اكلت وتفوق لا فورا راحت لادم وخلته اكل هو كمان ومن الواضح ان ادم اكل بدون اى مناقشه بدون ما يسالها ايه اللى انتى بتعمليه ده بدون ما يقولها ازاى كسرتى الوصيه و اكلتى بدون مايفكر ف رد فعل ربنا و ده اللى بيحصل معانا بالظبط خطايا كتير بتبقي قدامنا وبنبقى رافضينها و مستحيل نفكر اصلا مجرد التفكير اننا ف يوم من الايام ممكن نعملها ييجى الشيطان يغلفها وياخد ويدى معانا ف الكلام فجاه الخطيه تحلو ف عنينا ونشتهى اننا نعملها ومش بس بنكتفى بكده للاسف ممكن نوقع اصحابنا كمان معانا


الايه 7 و 8

فانفتحت أعينهما وعلما أنهما عريانان فخاطا أوراق تين وصنعا لأنفسهما مآزر
وسمعا صوت الرب الإله ماشيا في الجنة عند هبوب ريح النهار فاختبأ آدم وامرأته من وجه الرب الإله في وسط شجر الجنة

و بمجرد مااكلوا من الشجره اكتشفوا انهم عريانين و اول ماسمعوا صوت ربنا خافوا واختبئوا
الله طب ايه الجديد ياادم انت و حوا ما من لحظه ماربنا خلقكم وانتوا عريانين وبتمشوا قدام ربنا ومخفتوش ولا اتكسفتوا بالظبط زينا لما بنبقي مع ربنا وحياتنا الروحيه حلوة بنبقي عايزين نكشف كل خطايانا لربنا ونعرى نفسنا قدامه ومش مكسوفين واحنا بنقوله على كل عيوبنا لكن بمجرد ما بنسمع للشيطان ونعمل خطيه ورا التانيه فورا بنخاف من ربنا ونتكسف حتى نعترف قدامه بخطايانا وبنقرر اننا نستخبى ونبعد عن اى مكان ربنا موجود فيه

الايه 9
فنادى الرب الإله آدم وقال له أين أنت
ربنا نادى على ادم اين انت ! طبعا ربنا عارف ادم فين بس هو حب يقوله فينك ياادم بعد مااكلت من الشجره ربنا كان عايز يقوله شفت عصيانك وصلك لايه شفت كنت فين و بقيت فين ؟! و ده سؤال بيوجهه ربنا لكل واحد فينا فينك انت يابنى دلوقتى فين حياتك الروحيه فين علاقتك بيا

الايه 10 و 11
فقال سمعت صوتك في الجنة فخشيت لأني عريان فاختبأت
فقال من أعلمك أنك عريان هل أكلت من الشجرة التي أوصيتك أن لا تأكل منها
رد ادم و قاله اصل يارب لما سمعت صوتك خفت لانى عريان فقررت استخبى منك رد عليه ربنا وقاله ومين قالك ان انت عريان يعنى ايه اللى خلاك تخاف منى وتستخبى ماانا من يوم ما خلقتك و انت كده قدامى قولى ياادم هو انت اكلت من الشجره اللى انا قلتلك متاكلش منها طبعا ربنا عارف انه اكل بس حب يفوق ادم و يعرفه ان خوفه وخجله ده بسبب اكله من الشجره وكسره للوصيه اتاكد يابنى انك طالما خفت تقرب من ربنا و اتكسفت تعترف قدامه بخطايا انك كاسر الوصيه


الايه 12
فقال آدم المرأة التي جعلتها معي هي أعطتني من الشجرة فأكلت
ياريت بقي ادم فاق و ندم على اللى عمله وطلب من ربنا يسامحه لا رد بكل غرابه وقال لربنا الست اللى انت اديتهانى هى اللى اكلتنى انا ذنبى ايه بقي و دى غلطه كبيره بيقع فيها معظمنا لما بنقع ف خطايا و نبعد عن ربنا وييجى ربنا يفتقدنا بدل ما نقدم توبه و نعتذرله ونطلب منه ان يسامحنا لا بكل بجاحه بنعلق اخطائنا عليه ونقوله انت السبب يارب ماانت لو مسيبتناش الشيطان مكنش هايقدر علينا ماانت اللى بتسمح للشيطان انه يجربنا اصلا ياحبيبى اسمع ايوة انا بسمح للشيطان يجربك بس انا كمان مديك سلطان تدوس الحيات والعقارب و كل قوة العدو


الايه 13
فقال الرب الإله للمرأة ما هذا الذي فعلت فقالت المرأة الحية غرتني فأكلت
فقال ربنا لحوا ايه اللى انتى عملتيه ده ازاى تكسري الخطيه وتاكلى وكمان تاكلى ادم معاكى وياريت حوا اتعلمت من خطا ادم واعترفت هى بغلطها لا ارتكبت نفس الغلطه قالتله ماليش دعوه الحيه هى اللى اغرتنى وهى اللى خليتنى اكلت


وبعدها بقي ربنا حاسب الحيه وعاقب ادم و حوا و خلاهم ينزلوا الارض وياكلوا من تعبهم
وبرغم كل اللى عمله ادم و حوا و ف عز زعل ربنا منهم الا انه قبل طردهم من الجنه عملهم اقمصه يلبسوها حتى ف عقابك يارب بتكون حنين ايوة عدلك بيستلزم انك تنفذ كلامك و تطردهم من الجنه بس محبتك الكبيره وطبيتك خليتك تصنعلهم اقمصه و تسترهم ف الارض

اذكروني فى صلواتكم

mrmr bent elbaba

[Mary Naeem]

رووووووووووعة حببتي
ربنا يفرح قلبك

[walaa farouk]

ميرسى على مشاركتك الجميلة

[بنتك يايسوع]

ميرسي كتير لمروركم الجميل