اكتر وقت هتشوف فيه ربنا .. هو وقت الضيقه والمشاكل والظروف الصعبه .. تحب اثبتلك ؟!
الكتاب المقدس مقالش عن يوسف جملة ( وكان الرب مع يوسف ) الا بعد ما اتباع من اخواته واتظلم .. لما اتغرب وكان لوحده تمامآ .. والنتيجة المنطقيه ل جملة ( وكان الرب مع يوسف ) .. ان يوسف ( كان رجلآ ناجحآ )
..
يونان النبي .. محسش ان ربنا بيستجيب وبيسمع صلاته غير لما الدنيا اسودت ف عينيه واترمي ف بطن الحوت .. ولا كان عنده واتس اب يكلم عليه صحابه .. ولا كان ف ايديه موبايل يتصل ب حد ينجده .. كان بس جواه قلب لامس حضور ربنا
..
ايوب البار .. الراجل اللي ابواب الدنيا كلها اتقفلت ف وشه و خسر كل حاجه .. واتبهدل بعد سنين المجد والكرامه .. شوف يا أخي قال ايه ل ربنا .. ( بسمع الأذن قد سمعت عنك والأن قد رأيتك عيني ! ) .. عينه شافت ربنا امتي ؟! .. لما الدنيا ضاقت عليه .. واللي عينه بتشوف ربنا بيتعوض اضعاف
..
الفتيه التلاته .. ال 3 صحاب اللي اترموا ف اتون النار .. ربنا كان ممكن ينقذهم من بعيد ل بعيد .. يخرجهم من وسط النار ب أعجوبه .. لكنه اختار الحل الأعظم .. اختار انه يكون واقف معاهم .. وسطهم .. ف قلب النار
..
ربنا بيحب المتألمين .. صديق شخصي لكل الموجوعين .. بمجرد ما بيشوفك تعبان وف ضيقه بيجري عليك .. بيبان وقت الأزمات وبيظهر لما الكل بيختفي ..
يسوع اللي انت بتعبده اله جدع .. جدع اوي .. ف وقت الشده بيلحقك وبيشيل معاك .. حتي لو مطلبتوش هو بيسندك .. ممكن يخليك تمر بظروف صعبه او ألامات .. لكن مستحيل يسيبك لوحدك .. كل اللي عاشروه عرفوه .. وكل اللي عاشوا معاه جربوا جدعنته وامانته ..
يسوع هو الصديق اللي بيفضل وقت الضيق .. واسأل مجرب
