دي الحياة اللي خلقنا عشانها......

[Rena Jesus]

الحب خلّاق



وعشان كده الله قرر يخلق، لأن الحب بيخلق، الحب بيدّي حياة مش بيدّي موت ..
بالرغم من إنه كان عارف ان آدم وحواء هيكسروا الوصية وهيختاروا غلط، وكان عارف ان هو اللي هيدفع التمن عشان يتمم المصالحة -عشان يصلح اللي اتكسر زي ما بيقولوا بالبلدي- وده برضه مامنعوش انه يخلقهم من غير إرادة حُرة،
ماكنش ينفع يجبرهم يعيشوا معاه وهما رافضين، اِداهم كامل الحرية في انهم يختاروا يرفضوه ويستقلوا عنه بإرادتهم أو يعيشوا معاه في علاقة حُب ويخضعوا ليه ..
وبما انهم رفضوا الحياة معاه بكسرهم للوصية إلا انه لسه بيحبهم وعلشان كده اتحمل نتيجة غلطتهم ودفع تمنها..

الله خلقنا عشان فعلاً بيحبنا وهدفه إننا نكون مبسوطين ..
أيوة مبسوطين ومستمتعين بالحاجة اللي هو عملها لينا ..
مع انه عارف ان العالم هيكون مليان بالفساد والشر والألم، بس هو عنده رؤية تانية للحياة،
شايف ان الحياة تستاهل تتعاش بالرغم من فسادها وشرها وآلامها وصراعتها وتحديتها ومعافرتها،
لانه عايزنا نعيش حياة ليها معنى، ليها رؤية، ليها قيمة، حياة نكون فيها بنحقق وجودنا،
ونكون بنأثر في حياة اللي حوالينا، يكون لينا بصمة ومايكونش وجودنا زي عدمه، وده مش هيتحقق غير لما نفهم ونختبر حب ربنا،

وعشان نكتشف ده لازم نقرب منه يعني نعيش معاه علاقة حُب حقيقية مبنية على معرفته،
ووقتها هيكشفلنا عن هويتنا وهنعرف احنا مين وإيه الهدف من وجودنا وإزاي نعيش شغفنا
وبتبقى النتيجة في الاخر اننا بنعيش "مستمتعين ومؤثرين ومُثمرين"
دي الحياة اللي خلقنا عشانها، اللي تستاهل تتعاش واللي كمان بتمجّده

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسى على مشاركتك الجميلة

[Rena Jesus]

ميرسى لمروركم الغالى