الخلاصة .........

Rena Jesus · رقم المشاركة : ( 1 ) 13 - 02 - 2017, 04:36 PM

الخلاصة

١- صاحب الكل وحيد.
٢- إللى فاهم الحب بكل تفاصيله، مش مرتبط!

٣- كلام الناس كله غلط، أياً كان صح أو غلط.
٤- أنجح العلاقات أخفاها.

٥- كليتك العالية مش دليل إنك عبقري، ولا كليتك العادية دليل إنك تافه!
٦- التعليم المصري عامل زي ''النيش'' ، ملوش أي ستين لزمة بس لازم يبقي موجود.

٧- إذا معرفتش تكون ''بنادول''، حاول متبقاش صداع.
٨- إنت مش محور الكون مهما كنت مشهور.

٩- مش كل إللي بيضحك في وشك بيحبك،
ولا كل إللي بيعدي من جنبك من غير ما يسلم عليك بيكرهك!
١٠- مش شرط الناس تصقفلك عشان تكمل الحاجة إللى بتعملها ..
لو بتحبها كمِّل فيها حتي لو محدش إدالك إهتمام أصلاً.

١١- عيش حياتك إنت، متحاولش تقلد أي حد مهما كانت درجة نجاحه.
١٢- متحاولش تعيش زي بطل فيلم، عشان هو قصة مكتوبة مصممة إنها تعجب كل الناس!

١٣- أول ما تبدأ في المشي، الطريق هيبان، المهم تبدأ.
١٤- متصدقش شاعر، و لو كان برج العقرب إقتله قبل ما يتكلم.

١٥- علي قدر العشم يأتي الخازوق.
١٦- متمشيش تدلدق في روحك ورا حد، أياً كان مين.

١٧- كل حاجة بتعدي، بس و هي بتعدي بتسيب شوية حاجات مبيعدوش.
١٨- حاول تحافظ علي حلاوة البدايات أطول فترة ممكنة.

١٩- You are what you believe.
٢٠- فكر و متمشيش ورا القطيع، الكثرة مش دليل علي صحة المنهج.

٢١- السمك الميت بيعوم مع التيار، و السمك الصاحي بس هو إللي بيختار طريقه.
٢٢- متسحبش حد من دنيته لو مش هتعرف تزود علي حياته 100 حياة.

٢٣- لو مش هتعشق، متحبش .
٢٤- ملخص علاقات الحب إنك مبتحبش لما تختار، و مش بتختار لما تحب!

٢٥- كل واحد فينا جواه قصة غيرته و من ساعتها و هو مش عارف يرجع طبيعي زي الأول!
٢٦- Everything comes with a price.
، عشان كدة لازم تكون عارف إنت بتستغني عن إيه في سبيل إيه، عشان متندمش.

٢٧- لو في يوم إتعلمت الإنسحاب، هتبقي عادة.
٢٨- السنَّة لما عصبها بيموت إستحالة ترجع تلمع تاني زي الأول ..
عامل الناس كلها بالأسلوب ده.

٢٩- مفيش حاجة اسمها Forever ، كلنا فترات في حياة بعض غير كده محن.
٣٠- كل مشكلة و ليها أكل.

٣١- مشاكلك لو خرجت برا قلبك و حكيتها، يبقى بتزود عليهم واحدة كمان .
٣٢- حاول تفرق بين "الچنتلة" و "النحنحة"
عشان الأولانية بتخليك مميز و التانية بتخليك ملزق!

٣٣- رتب دولاب حياتك كل فترة،
و إتبرع بالناس إللى صغرت عليك لناس تانية تلبسهم.
٣٤- شوية الشوية اللي فاضلين عندك، فاضل شوية و هيروحوا.

٣٥- ‏سنك في البطاقة غير سنك في المرايا غير سنك مع حد بتحبه غير سنك و إنت فرحان غير سنك و إنت زعلان، جوا عمرك عمر تاني..
٣٦- الموت (منبة) ، مظبوط علي عمر إللى جنبك، عشان يصحيك إنت!