سيبه يرد بطريقته

[walaa farouk]

من أغرب المشاهد اللي شوفتها، بس للأسف اكتشفت انها حقيقية!!

" كان فيه مرة راجل بيغرق في البحر، فعدى جمبه قارب فيه ناس، فسأله الراجل صاحب القارب " هو انت محتاج مساعدة؟ " راح الراجل رد عليه بكل سرعة وقاله " لا، شكرًا مش عايز، ربنا هيساعدني"! وبعد شوية من الوقت، عدى جمبه قارب تاني، وصاحب القارب سأل الراجل نفس السؤال.. وكان رد فعل الراجل غريب لأنه جاوب نفس الإجابة " شكرًا، مش عايز مساعدة، ربنا هينقذني! " ولأن طبعاً بسبب رده ده مافيش حد أنقذه فالراجل مات وطلع السماء عند ربنا..

وسأل ربنا " أنت ما أنقذتنيش ليه، دا أنا كنت عمال أصليلك وأصرخلك أقولك أنفذني وانت مكونتش بترد عليا!!" وكانت الإجابة اللي صدمت الراجل جدًا، ربنا رد عليه وقاله " كان فيه قاربين عدوا عليك وكانوا عايزين ينقذوك وأنت ماردتش .. القاربين دول أنا اللي باعتهم ليك، أنا سمعت صراخك وصلاتك ليَّ وكنت فعلاً عايز أنقذك!!

المشهد ده وقفني قدام نفسي كتير أوي، أوقات كتير لما بطلب من ربنا حاجة، بيبقى في دماغي طريقة معينة الله هيجاوب بيها أو يعني بصراحة أكتر دي الطريقة اللي أنا ببقى عايزاه يجاوب بيها عليا، وعلشان كده لما بيجاوب هو بطريقة مختلفة مش ببقى قادرة أفهم رده وفي الأخر ببقى زي الراجل ده بقوله انت كنت فين أنا كنت بنادي عليك من بدري وانت مش سامعني!!

لما تطلب من ربنا حاجة، سيبه هو يرد عليك بالطريقة اللي هو شايفها مناسبة ليك، كل اللي عليك تقوله يا رب انا واثق انك سمعتني ومصدق أنك هتجاوبني .. إديني عينين وقلب وذهن مفتوح علشان أقدر أفهم طريقة إجابتك ليَّ ..

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى ربنا يفرح قلبك

[walaa farouk]

ميرسي كتير على مروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسي على مرورك الغالى مينا