ارجوكم.. متتأخروش

[Rena Jesus]

- اعرف اتنين كانوا مرتبطين و انفصلوا و كل واحد عاش حياته ..
بعد سنين كتير رجعوا يتكلموا كانوا بيحاولوا يرجعوا اللي بينهم ..
هما الاتنين كانوا باقيين علي بعض بس فشلوا ف انهم يرجعوا لان شغفهم بوجود بعض مبقاش موجود ..

- كان في واحدة صاحبتي جداا و بيننا عشرة و مواقف حلوة ..
ف مرة زعلنا مع بعض و كانت هي اللي غلطانة ..
استنيتها تيجي تصالحني .. عدا شهر و اتنين و مجتش ..
بعد فترة كبيرة لقيتها جاية تصالحني و عملالي مفاجأة و جيبالي الحاجات اللي بحبها ..
فرحت جدااااا لانها كانت وحشاني ..
بس عمري ما عرفت ارجع اتعامل معاها زي الاول لانها اتأخرت اوي

- يوم نتيجتي ف اولي جامعة كنت متخانقة مع بابا ..
بس اول ما عرفت اني جبت تقدير جريت عليه و انا مبسوطة جدا و قولتله النتيجة طلعت ..
كان بيتفرج علي التليفزيون مبصليش حتي .. قالي مبروك بقرف كدة ..
بعد شوية جه يحضنني و يقوللي مبروك و يهزر معايا ..
اتبسطت صحيح بس مش اوي اصل كنت مستنية منه
انه من الفرحة هيقوم يحضنني ف ساعتها و نعيط كالعادة ..
بس رد فعله جه متأخر شوية

- واحد زميلى كان بيحب واحدة اوي ..
حب كدة زي اللي كلنا نفسنا فيه .. زي اللي ف الافلام ..
بعد ما انفصلوا بشوية هي اتخطبت .. و فرحها قريب جدا
لما سألته انت ازاي لسة بتحبها بعد ما عدا علي الموضوع اكتر من 6 سنين و هي خلاص هتتجوز !! ..
قالي انا مبحبهاش انا بحب الموضوع كله لان كل حاجة كانت تمام
بس حتى لو رجعت دلوقتي تقوللي نرجع مش هوافق ..
علشان هتبقي متأخرة اوي

- عيد ميلادي اللي فات فضلت ماسكة الموبايل اكتر من 5 ساعات ..
مستنية رسالة معينة و معتقدة ان الشخص دا قاعد بقي مستني الساعة تيجي 12 عشان يكلمني
يقوللي كل سنة وانتي طيبة ..
عدت الساعة 12 و فضلت مستنية لحد ما نمت وانا ماسكة الموبايل ..
الرسالة جتلي تاني يوم .. مفرحتش .. اصل انا كنت مستنياها تيجي الساعة 12..

- مرة غلطت ف حد و الموضوع عدا عليه كتير و نسيت ..
بعد فترة حد غلط فيا نفس الغلطة ف افتكرت ..
و قررت اروح اعتذر للشخص دا و روحت فعلا ..
كان الرد حاجة واحدة " انتي بتعتذري بعد ايه .. هو انتي لسة فاكرة " ..

- كنت مخنوقة جداا و عايزة اتكلم مع حد .. اتصلت بواحدة صاحبتي كتير مردتش ..
فضلت ماشية ف الشارع بعيط لوحدي ..
بعيط عياط هيستيري كأن حد مات لدرجة ان واحدة معرفهاش وقفتني
و فضلت تقوللي طب اهدي خلاص و ان شاء الله خير ..
روحت البيت ونمت ..
صاحبتي اتصلت بعد يومين و اعتذرتلي انها كانت مشغولة جدا الفترة اللي فاتت ..
فضلت ساكتة مش عارفة اقولها ايه ..
كل اللي كنت بفكر فيه ساعتها شكل الناس و هما بيبوصولي و متعاطفين معايا جدا !!
صاحبتي اعتذرت مليون مرة بس انا جوايا حاجة اتكسرت و عمري ما هعرف احتاجلها تاني ..
اصلها اتأخرت اوي

اوعوا تفتكروا ان فيه شخص هيفضل يحبكوا علطول وانتوا مش مقدرينه ..
هييجي علي نفسه مرة واتنين و كتيير بس هييجي يوم و يوصل لمرحلة برود تام ..
برود ف مشاعره ناحيتكم ..

بلاش تتأخروا و تأجلوا الحاجة لحد ما شغف اللي قدامكم بيها يروح ..
طعم الاكل لما تكون جعان احلي بكتير من طعمه لما تكون بتاكل عشان زهقان وخلاص ..
الشغف بالشخص او بالحاجة بيروح لما تتأخر اوي عن الوقت المناسب ..

ارجوكم ..
متدخلوش ف علاقة صداقة او حب غير و انتوا قد العلاقة دي ..
قبل ما تدخلوا اي علاقة و تعشموا الناس فيكوا ..
اعرفوا واجباتكوا ايه ناحيتهم الاول ..
و لما تغلطوا اعتذروا ف وقتها ..
قولوا للناس انكوا بتحبوهم اول ما تحسوا بمشاعر ناحيتهم و متترددوش ..
الوقت بيقتل المشاعر ..

ارجوكم تاني .. متتأخروش

[walaa farouk]

صح يا رينا جدا
ميرسي على مشاركتك الجميلة

[Rena Jesus]

ميرسى لمرورك الغالى

[dodo dodo]

روووووووووووعه
خلتنى اخد بالي

[Rena Jesus]

ميرسى لمرورك الغالى

[الصخره]

- عيد ميلادي اللي فات فضلت ماسكة الموبايل اكتر من 5 ساعات ..
مستنية رسالة معينة و معتقدة ان الشخص دا قاعد بقي مستني الساعة تيجي 12 عشان يكلمني
يقوللي كل سنة وانتي طيبة ..
عدت الساعة 12 و فضلت مستنية لحد ما نمت وانا ماسكة الموبايل ..
الرسالة جتلي تاني يوم .. مفرحتش .. اصل انا كنت مستنياها تيجي الساعة 12..

الموضوع دا حصل معايا عيد ميلادى اللى فات
كنت فعلا حزين جدا

[Mary Naeem]

ياريت ناخد بالنا من المواضيع دي

بجد بتفرق كتير

[Rena Jesus]

ميرسى لمروركم الغالى