خليك موجود دايما جنبها

[Rena Jesus]

في مصر مش بنعترف بحاجة اسمها "اكتئاب الحمل واكتئاب ما بعد الولادة" ولا في جلسات مساندة نفسية للأمهات الجديدة.




الأم الجديدة محتاجة مساحة تظهر فيها ضعفها،
تعيط وتصرخ وقت ما تحب.
محتاجة مساحة تخطيء وتصيب فيها من غير ما حد يتدخل ويعدل عليها ويتهمها بالإهمال،
كفاية إحساسها بالخوف والقلق إنها تكون بتعمل حاجة بطريقة غلط.

الأم الجديدة محتاجة دعم غير مشروط وحضن يحتويها من غير أسئلة كتير،
محتاجة مساحة تفرغ فيها حزنها ومخاوفها اللي هي نفسها مش فاهماها.

الأم الجديدة محتاجة وقت لنفسها ترجع فيه لطبيعتها وحياتها القديمة،
تلبس هدومها اللي بطلت تلبسها، تصبغ شعرها،
تلبس كعب براحتها،
أو حتى تنام من غير ما تفكر في البيبي.
متسكترش عليها الحاجات دي وتتهمها بالتفاهة والسطحية.

الأم الجديدة استحملت بطنها المنفوخة ورجلها الوارمة وضهرها اللي بيوجعها وهدومها اللي مبقتش تدخل فيها ولغبطة الهرمونات وآلام الولادة أو القيصرية وقلة النوم بعد الولادة والسهر بس هي عارفة إن ده كله فترة وهتعدي.

الصعوبة الحقيقية بتكون في عدم قدرتها على الإستسلام للضعف والحزن والإكتئاب والغضب.
ازاي تستسلم للمشاعر دي وهي مطالبة بالإهتمام بطفل ميعرفش حاجة في الدنيا غيرها وبيستمد فرحه وحزنه واحساسه بالأمان منها.
مفيش فرصة للخطأ، للعياط، للمرض. بالإضافة لخوفها من تربية بنت في مصر.

خليك موجود دايما جنبها تسندها لما تقع وتوفرلها المساحة الآمنة اللي هي محتاجاها عشان تستسلم لمشاعرها السلبية وترجع تاني لطفلها.

[Mary Naeem]

موضوع مميز
ربنا يباركك

[walaa farouk]

ميرسي على الموضوع الجميل والمميز

[Rena Jesus]

ميرسى لمروركم الغالى

[Ramez5]

موضوع جميل ومثمر
ربنا يبارك خدمتك

[Rena Jesus]

ميرسى لمرورك الغالى

[MenA M.G]

موضوع أكثر من روعة .. مشاركة جميلة جدا
دائماً فى تقدم ورقى
ربنا يبارك خدمتك

[Rena Jesus]

ميرسى لمرورك الغالى