نصيحه لكل بنت

[walaa farouk]

احنا بنضيع سنين شبابنا ( احلى سنين عمرنا ) عشان بس نحاول نرتبط بيكم ..
يكفي انك تعرفي ان اى شاب عشان يتجوز بيحتاج ف رينــج الربع مليون جنيه كـحـــد أدني ( شبكه و شقه وعفش وفرح و .. و .. ) فى بلد رينج الرواتب فيه 1500جنيه ( بلاش تحسبيها عشان متتصدميش )
• العريس المصري هو الوحيد فى العالم اللى لازم يتجوز وهو مديون

صدقيني احنا بنحط معايير تانية لكرامتنا خصوصا بعد الارتباط او الخطوبة ( الشاب بيبقي حاسس انه شايل مسئولية حد تانى غيره )
ممكن تلاقيه يستحمل رزالة مديره ف الشغل ..
وممكن يستحمل مشاكل الشغل وقرفه عشانك او عشان هو مطالب بحاجات مطلوب منه يجيبها فى معاد محدد ..
لانه لو اتأخر ممكن متكونيش ليه
• بالمناسبة .. 99.9 % مننا مش مرتاحين ف شغلهم ويمكن يكونوا مش حابين الشغل ده اصلا بس مضطرين يكملوا
وطالما مش لاقي الراحه فى شغله .. خليه يلاقي الراحه ف بيته وتكوني انتي السبب فيها
الشاب ممكن يشتغل سنه كاملة عشان يجيبلك كام جرام دهب تلبسيهم فى فرحك وعشان متبقيش اقل من بنت عمك او بنت الجيران
وممكن تلاقيه اشتغل سنه كامله برده عشان يعملك فرح ف قاعة محترمه ويشتريلك فستان شيك مش هيتلبس غير مره وحده فى العمر
انا عارف ان هو ده المفروض
والمفروض ان الراجل هو اللى يشتغل ويتعب
وعارف ان بعد الجواز الدور بيبقي مشترك بينهم
بس تفتكري على قد ده كله الشاب ده يستاهل انك تكوني سبب فى تعبه او انك تنكدي عليه
الراجل بطبعه ميحبش يشكي
خصوصا لزوجته او خطيبته ( ميحبش يبان ليها انه مكسور ) فبيكتم فى نفسه وميتكلمش فممكن يبانلك ان الدنيا تمام معاه اوى وانتى اللى شايله كل الهموم
واحنا كــ ( شباب مقبل على الجواز ) ضحية مجتمع غبي وعادات وتقاليد منيله بـ 60 نيلة
بس بلاش تبقي انتي كمان عليه .. خلى راحته هى هدفك الاول

باختصار :-
الراجل ميقدرش يستغني عن مراته او حبيبته لو حس انها سبب راحته وسعادته ..
انما يقدر يستغني عنها لو كانت ملكة جمال الكون بس مش لاقي الراحه معاها ..!

[Rena Jesus]

ميرسى ربنا يفرح قلبك

[walaa farouk]

ميرسي على مرورك الغالى رينا

[Kerolos_Faik]

موضع مميز ..مشاركة رائعة
ربنا يبارك تعب محبتك ...

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي كتير على مروركم الغالى