في علاقات للأسف مش بينفع فيها غير البتر!
وبقول "للأسف" لأن فكرة البتر نفسها فكرة مؤلمة جداً..
انت فعلياً بتقطع حته منك إلى الأبد!
الموضوع ده صعب وبيوجع القلب جدا...
واحد متعود انه عنده إيدين فاجأة بقيت إيد واحدة!
محتاج يتكيف مع الألم النفسي لفقد الإيد التانية كل يوم وكل دقيقة لحد ما يتعود!
وللأسف -مهما كان فاهم ان ده لمصلحته- حاجات كتيررررر هتفكره كل شوية إنه كان عنده إيد تانية مستمتع بيها..
وخلاص راحت!
قرار البتر صعب جداااا بس للأسف ساعات بيبقى هو الحل الوحيد عشان باقي الجسم مايمرضش والإنسان يموت!
بيبقى فقد إيد واحدة أهون من فقد الحياة كلها!
وماينفعش ساعتها نقول طيب نقطع حته من الإيد ونسيب حته متعلقة كده!
الجزء المريض لازم كله يتشال!
المشكلة ان في جسمك بتروح للدكتور يقنعك بالأسباب بعدين يخدرك ويقطع..
إنما في العلاقات الإجتماعية ساعات بتحتاج انت اللي تمسك السكينة وتقطع بنفسك من غير شرح ولا إقناع لأنك عارف إنك لو إتأخرت دقيقة هتضعف ومش هتقدر!
بتغمض وتاخد نفس وتقطع وانت بتصرخ زي اللي لدغة تعبان في وسط الغابة وهو لوحده !
كنت زمان بقول إني عمري ما هقطع علاقتي بحد مهما حصل ..
بس مع الوقت اكتشفت ان في ابواب فعلا ماينفعش تفضل متواربة!
ماينفعش! لازم تتقفل!
ممكن يكون من شدة الكره أو من شدة الحب..
في الحالتين لازم تتقفل لأن العلاقة بايظة والهوا اللي جي منها مُضر..
لو فضلنا نحس بيه هنموت!
قلبك بيبقى هيتقطع كل ما تفتكر بس خلاص!
دي لحظة ماينفعش فيها غير أن العقل يقود بدل ما نضيع كلنا!
بتضطر فعلا تقطع ما بينكم اي ميه ونور وهوا وتوقف نفسك كل دقيقة إنها ترجع توارب الباب او تبص حتى من وراه..
وتفكر نفسك كل ثانية هو ليه كان لازم فعلا يتقفل بالشمع الأحمر..
وتلهي دماغك كل لحظة من إنها تفكرك باللي حصل واللي جرا أو إنها توهمك إن القصة لسه ماخلصتش...
خلاص مش عايز افتكر اي حاجة لا حلوة ولا وحشة!
مفيش حل غير البتر... مهما كان مؤلم!
