خناقات المصالح

[walaa farouk]

راضى .. انا عارفة انك تعبت جدا ..
لحد ما عرفت تجمع فلوس الجواز ..
ونوصل لليوم ده ..
ربنا يقدرنى واسعدك ..

عارفة يا هادية ..
على اد صعوبة اللى مرينا بيه ..
على اد حلاوة فرحتنا دلوقتى ..

وتعدى الايام ..
مش احسن حاجة فى الدنيا ..
ضيق الحال ..
وقلة الفلوس ..

وفجأة .. انا حامل ..
هنعمل ايه ..

انتى مالك قلقانة كدة ..
ما اللى دبر لنا اننا نتجوز ..
لسة موجود ..
وهيدبر كل اللى جى ..
ماتخافيش ..

بيت هادى .. مافيش صوت بيطلع منه ..
غير صوت عياط البيبى ..

بنوتة قمر .. سموها نور ..

والجيران مستغربين للبيت اللى مافيهوش صوت ..
غير صوت البيبى .. وضحك البيبى ..

وتعدى السنين زى ما هى ..
الحال لسة ضيق ..
بس البيت لسة هادى ..

كل ده وجارهم الراجل الكبير ..
عم حكيم .. عمال يراقب راضى ..
طالع داخل على وشه ابتسامة ..
رغم هدومه اللى بتتكرر فى الاسبوع 3 مرات ..
عشان ضيق الحال ..

حتى لما الظروف تسمح ويشوف هادية ..
وهى نازلة بنور او راجعة ..
يلاقى الوضع مايفرقش كتير ..

ولسة البيت مافيهوش غير صوت ..
عياط نور .. وضحكها وهى بتلعب ..

لغاية ما فى يوم ..
كل ده اتغير ..
وصحى عم حكيم بالليل ..
على صوتهم ..

ايه اللى انتى بتقوليه ده ..
انا استحالة اوافق على كلامك ..
وكلمتى هى اللى هتمشى ..

وهى ترد عليه .. بمنتهى الحدة ..
اللى انت بتقوله ده ما ينفعش ..
وانا مش هاسمح بيه ..
وكلمتى هى اللى هتمشى ..

هادية .. انتى اول مرة تعارضينى ..
راضى .. وانت من امتى بتجبرنى على حاجة ..

وفضلت المناقشة كدة ..
رايحة جاية ..

يووووو .. بقالنا ساعة بنتكلم ..
وانتى مصممة على اللى فى دماغك ..

قام لبس هدومه ..
وراح خبط عليهم ..

ايه يا جماعة .. ليه كدة بس ؟
دانا بقالى سنين جاركم ..
عمرى ما سمعت صوتكم ..

كويس انك جيت يا عم حكيم ..
احضرنا بقى ..

فيه ايه يا هادية ..

دلوقتى راضى .. جات له علاوة فى شغله ..
ومن زمان ما جاتلوش اى علاوة ..
اول ما قال لى ..
قلت له ..
روح هات بالطو عشان انت بتنزل فى الفجر ..
والجو بيبقى ساقع عليك ..

طب بالذمة دا كلام يا عم حكيم ..
الهانم عايزانى اجيب بالطو ..
وهى بقالها ييجى سنة ..
مش عارفة تجيب بلوزة ..
عشان مصاريفنا وحضانة نور ..

ياعم حكيم ..
هو انا باخرج اروح فين بس ..
عشان اجيب بلوزة واركنها ..

طب بص كدة يا عم حكيم ..
انا اساسا بالبس البلوفر ده تحت القميص ..
وبابقى دافيان ..
اجيب بالطو ليه بقى ..

ماهو البلوفر ده ماعندكش غيره ..
ولما بيتغسل بياخد وقت عشان ينشف ..
ومش معقول تفضل رايح جاى بيه .. هو هو ..

كل ده وعم حكيم واقف مربّع ايديه ..
وباصص لهم هم الاتنين ..
وكاتم ابتسامته .. عشان هم الاتنين مشحونين ..

وفاق على سؤال راضى ليه؟

احكم بقى انت يا عم حكيم ..

بص لهادية ..
وقال لها بصراحة جوزك عنده حق ..
البلوزة اهم ..
وانتى لازم تاخدى الفلوس ..
عشان تجيبى بيها البلوزة ..

انت ازاى بتقول كدة يا عم حكيم ..

وفضل راضى بتنطط .. وهو بيضحك
مش قلت لك ..
هيييييييه .. عيب يابنتى ..
البلوزة اهم ..

بص له عم حكيم ..
وهو مش قادر يكتم ضحكته ..

ياعم اهم ايه بس ..
البالطو طبعاً اهم ..

قاموا هم الاتنين بصوا له ..
ومش فاهمين ..

قال لهم انا عشت سنين فى البيت ده ..
مش عارف سر بيتكم ..
اللى مابيطلعش منه صوت ..
غير صوت بنتكم ..
ضحكها ولعبها ..
كنت باسأل نفسى ..
هو الاتنين دول مش بيختلفوا؟
مش بيزعلوا؟
مابيحصلش سوء تفاهم؟

واول ما سمعت صوتكم انهاردة ..
وكل واحد بيحاول يمشى كلمته على التانى ..
قلت يااااه .. اخيرا صوتهم طلع ..
بس لما جيت وسمعتكم ..
فهمت سر سنين الهدوء اللى فاتت ..

انتو الاتنين ..
بتدوروا على الصالح ..
مش المصالح ..

عشان كدة يا راضى ..
انت هتجيب البلوزة لهادية ..
وانا هاجيب لك البالطو ..
انا لو كان ربنا ادانى ولاد ..
ماكنتش هاتمناهم احسن منكم ..

وقبل ما يردوا عليه ..
كان قام وقال لهم ..
تصبحوا على خير .. يا اهل الخير ..

قفل الباب وراه ..
وفضلوا هم الاتنين يبصوا لبعض ..

خدها فى حضنه وقال لها ..
حقك عليا عشان عليت صوتى عليكى ..
قالت له .. عارفة انه غصب عنك ..
مانا اول مرة اعارضك ..

و فى اول الاسبوع ..
نزل راضى من بيته بدرى كالعادة ..
وهو لابس البالطو الجديد ..
بص على بلكونته ..
لقى مراته بتشاور له وهى لابسة البلوزة الجديدة ..
عشان رايحة توصل نور الحضانة ..

وعم حكيم من ورا شيش البلكونة ..
واقف بيضحك .. ويقول لنفسه ..
صحيح ..
فى خناقات .. بسبب المصالح
وخناقات .. عشان الصالح ..

الحكاية اللى فوق ..
حصلت بكل تفاصيلها ..
مع تغيير بسيط فى الاسامى ..
وشخصية عم حكيم ..

بس راضى وهادية ..
موجودين ..
والبلوزة والبالطو برضه موجودين ..

ودول كفاية انهم يقولوا لنا ..
لسة فيه فرصة نجرب ..

التغيير صعب .. بس مش مستحيل ..
ولو الخير من ربنا .. والشر من اى حاجة تانى ..
يبقى حرب الخير والشر .. محسومة ..
لو احنا عايزين نحسمها ..

والكلام ده حقيقى جدااا ...

أمير تادرس

[Rena Jesus]

مشاركه متميزه
ميرسى ربنا يبارك تعب محبتك

[Mary Naeem]

مشاركة جميلة جدا

ربنا يبارك حياتك

[walaa farouk]

رينا
مارى
ميرسي كتير على مروركم الغالى

[MenA M.G]

موضوع أكثر من روعة .. مشاركة جميلة جدا
دائماً فى تقدم ورقى
ربنا يبارك خدمتك